Khawtual-a COVID-19 inkaichhawnna chhutchah nan 'COVID-19 No Tolerance Fortnight' hman tum a ni

Karleh Thawhtanni atanga tan turin Mizoram-ah 'COVID-19 No Tolerance Fortnight' hman tum a ni.

Tunhnaia Mizoram chhunga COVID-19 hripui leng dinhmun thlira thutkhawm hmanhmawh (Emergency Meeting) chu nimin khan Health Minister, Dr. R. Lalthangliana hovin SAD Conference Hall-ah neih a ni a, he thutkhawm ah hian COVID-19 dona kawnga hmalatu Department hrang hrang hmalakna ngaihthlak a nih hnuah, COVID-19 laka Mizoram dinhmun a derthawng lehzual nia hriat a nih avangin 'COVID-19 No Tolerance Fortnight' neih nise tih a ni a. Hemi hun chhung hian COVID-19 dona atana sawrkar ruahmanna siam hrang hrang - Unlock 

Guidelines, Standard Operating Procedure (mipuite zawm tur) hrang hrang leh The Mizoram Containment and Prevention of COVID-19 Ordinance, 2020 te chu khauh tak leh ngaihnathiamna tel lova kalpui tum niin hetianga hmalakna a nih chuan khawtual-a COVID-19 hri inkaichhawnna (Transmission Chain) chu chhutchah theih beisei a ni a. Chief Secretary kaihhruaina hnuaia awm State Executive Committee, Mizoram State Disaster Management Authority-in 'COVID-19 No Tolerance Fortnight' kalpui dan tur kimchang an duang dawn a ni.

He thutkhawm ah hian tunhnai ni 5 chhungin COVID-19 hri kai zirlai 13 leh zitirtu pakhat hmuhchhuah tawh an nih thu tarlan a ni a, heng zinga 4 hi Hostel-a lut hman tawh niin, Hostel lut lo 4 an awm a. Tunhnai kar hnih chhunga hri kai hmuhchhuah zinga a tam zawk chu symptom nei (natna langchhuak) an nih thu tarlan a ni bawk. Aizawl Civil Hospital OPD-ah pawh COVID-19 hri kai hmuhchhuah an awm thin avanga OPD khar thut thut a ngaih thin thu tarlan niin, hemi avanga mipuiten harsatna an tawk thin chu Civil Hospital thuneitute chuan pawi an tih thu an sawi a, rang taka OPD an tih thianghlim nghal zung zung thin thu leh a him tawk nia an hriat veleh an hawn chhunzawm leh nghal thin thu an sawi a ni.

Hei bakah hian lirthei tlanchhuak tam lutuk chungchang pawh sawilan niin, hemi lama thuneitute nen a rang lama ngaihtuah nawn leh tha an ti a. District tin Bawrhsap ten Health Department Official-te nen inrawn tlangin, Containment area/Zone puan a tul a nih chuan rang taka hmalak zel ni se an ti bawk.

Health Minister chuan fimkhurna kawnga inthlahdah lo tura mipuite chah nawn lehin, “Hun rei tak tha thlah lova sawrkar, Kohhran, NGO, khawtlang hruaitute leh mipuite theihtawpchhuaha kan tan tlanna in rah tha a chhuah a, tun thlengin khawvel leh India ram hmundang aiin kan ziaawm zawk niin a hriat a, he kan thawhrimna, tha leh zung bakah sum tam tak kan sen tawhna hi a thlawna a kal ral mai loh nan mitinten tan i la thar leh ang u,” a ti a ni.