Mizoram-ah COVID-19 hri kai 31 hmuh belh leh an ni

/

Niminpiah khan Mizoram-ah COVID-19 hri kai mi 31 hmuhchhuah leh niin hri kai hmuhchhuah zingah hian COVID-19 dona kawnga thawk tura inpe pakhat a tel.

Niminpiah khan ZMC Laboratory-ah Sample 215 enfiah niin heng atang hian hri kai hmuh thar an awm lova, District hrang hranga TrueNat Laboratory-ah Sample 122 enfiah niin heng atang hian hri kai 29 zet hmuhchhuah an ni thung. Lawngtlai District-ah hri kai 15 hmuhchhuah niin an vai hian mipa kum 22 atanga 30, mipa vek niin Jharkhand atanga rawn kal, BRO hnuaia Labour hnathawk niin inkhunghranna hmuna awm an ni a. Lunglei District-ah BSF Sipai hri kai mi 7 hmuhchhuah ni bawkin an vai hian mipa niin West Bengal, Assam, Odhisa, Jammu & Kashmir, Bihar leh Uttar Pradesh atanga rawn lut, inkhunghranna hmuna awm an ni bawk. Mamit District-ah hri kai 5 hmuh ni bawkin an zinga mipa 4 te chu Power & Electricity Department hnuaia hnathawk tur Tezpur, Assam atanga lo kal leh khunghran lai niin hmeichhia pakhat, Tripura atanga rawn haw In lama inkhunghrang mek chuan hri a kai tih hmuhchhuah a ni bawk. Champhai District-ah hri kai pakhat hmuh niin India Army, chawlh hmang tura rawn haw a ni thung a, Kolasib District-ah COVID-19 volunteer, CCC-a duty hmeichhia pakhat chuan hri a kai tih hmuhchhuah a ni bawk.

Rapid Antigen Test hmangin niminpiah khan Sample 779 enfiah ni bawkin heng atang hian hri kai mi pahnih hmuh an ni leh bawk a, pakhat zawk hi Lunglei ami BSF Sipai, zinchhuahna neilo niin pakhat hi Mamit District ami, JNV School-a thawk Zirtirtu a ni thung.

Nimin khan Mizoram-ah hri kai mi 33 enkawl dam leh an ni a, heti hian Mizoram-a hri kai hmuhchhuah 2049 atangin mi 1754 enkawl dam niin zaa 85.60 enkawl dam an ni tawh a, enkawllai 295 an la awm a ni.

India ramah hri kai hmuhchhuah an pung zel :

Darkar 24 kalta chhungin India ramah COVID-19 hri kai 81,484 zet hmuh leh niin mi 78,877 enkawl dam an ni thung. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 10,97,947 enfiah leh niin heng atang hian hri kai 81,484 hmuh leh niin India rama Sample 7,67,17,728 enfiah atangin hri kai 63,94,068 hmuh an ni tawh a. Heng hri kai hmuhchhuah atang hian mi 53,52,078 te chu enkawl dam ni tawhin hri kai hmuh tawh zawng zawng atanga zaa 83.70 te chu enkawl dam an ni tawh a ni.

India ramah hian COVID-19 hri kai zingah nunna chan mi 99,773 zet an awm tawh bawk a, darkar 24 kalta chhung khan hri kai zingah nunna chan 1,095 an awm belh leh a, hri kai hmuh tawhna State leh UT zingah Mizoram chiah nunna chan awmlohna ala ni chhunzawm zel a ni.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »