Ministry of Labour & Employment hnuaiah Mizoram-ah Free Special Coaching hawn a ni

Sawrkar laipui-a Ministry of Labour & Employment in Mizoram a vawikhatna atana ‘Free Special Coaching’ a buatsaih chu nimin khan Labour Employment, Skill Development and Entrepreneurship (LEDSE) Special Secreatry, Dr. Lalzirmawia Chhangte chuan a hawng.

Thla 11 chhung awh tur ‘Free Special Coaching’ hawnna Archives Hall, Babu-tlang-a neih ah hian Dr. Lalzirmawia Chhangte chuan Human Resource Development chu keini State ang, Industry leh Factory te nei ve lo tan chuan a pawimawh thu a sawi a. Heta rahbi pawimawh em em mai chu Skill Development a ni tih sawiin, Thalaite thiamthil neih tir, chhawrtlak thiam thil (emplyable skill) neih tir hi a lo tul tak zet a ni tih a sawi.

Dr. Lalzirmawia Chhangte chuan Mizo thalaite hian hmasawnna tur kan la neih chu kan hnathawh ah professionalism neih a ni tih pawh sawiin, “Hnamdangte ang thoin kan tum chuan kan hna ah hian chhawr tlak leh rintlak kan ni thei a, kan professional thei a ni. Eng hna ah pawh State pawn atanga hnamdang lakluh ngai lovin Mizoram hi a intodelh thei a, a pawimawh chu hna thawk tura thiamna (skill) neih leh chumi atana zir (skill training) neih a ni,” a ti bawk.

He hunah hian Special Guest, Er. Lalmuanawma, DLEO, Aizawl District chuan National Career Service chungchang sawiin, Mizo thalaiten skill kan neih a pawimawhzia a sawi a, thiamna tak kan neih chuan hna hi tam tak a awm thu te, Employment Exchange -ah hian in register that zia te, tum ruhna neihte a pawimawh tih te a sawi bawk.

He hunah hian Special Coaching Scheme chungchang chu Course Director, Er. Remtluangi Renthlei chuan sawifiahin, he Special Coaching hi sawrkar laipui sum tum vek (100% Central funded) niin, SC/ST hmasawnna tura buatsaih a ni a, Special Coaching for SC/ST hi India ram State hrang hrang atangin Centre 19 thlan a ni. Coaching neih chhung hi thla 11 niin, Candidate tin hi thla tin stipend Rs. 1000/- chu an Bank account-ah dah a ni ang a, Book Grant thlengin Department hian a pe dawn tih a sawi bawk. Ruahman ang chuan tumkhat-ah mi 50 in an zir anga, mipa 24 leh hmeichhia 26 an ni.

NCS Coaching Centre hi VTR Computer Centre, Khatla, Aizawl-ah a awm dawn a, VTR Computer Centre hi NCS-ah leh NSDC-ah Training Provider niin, Skill Development Job Role chi hrang hrang an kalpui mek a, hei bakah MSCTE, H&T Education, Govt. of Mizoram hnuaiah Affiliated Institute niin Computer Zirna hlawhtling takin an kalpui mek bawk. Kum 2017 khan Computer Centre an kalpui that avangin Central Minister, Giriraj Singh-in a lo tlawh tawh bawk a ni.