Latest News

Chanchin thar thenkhat :

 Speaker in leiminna tlawh

    Assembly Speaker leh Chalfilh bialtu MLA ni bawk, Lalrinliana Sailo chuan nimin khan a bial chhung, Phullen khuaa leitawlh in kawngpui a tihchhiat te a hmunah a enfiah. Phullen khuaa leitawlh hi October ni 2 leh 3-a thleng kha a ni a, he leitawlh hian Phullen Presbyterian Kohhran Biak In hnuai kawngpui (Highway) a la bal vek a. Tunah hian khawchhung inkalpawhna kawng pakhat chiah a awm mek a. Geologist te pawhin nimin khan an hmanrua te nen Phullen leitawlh endik leh zirchian hna an thawk nghal a ni. Assembly Speaker chuan leimin avanga chhiatna tawkte a tawrhpui thu sawiin, chhawmdawlna sawrkar atanga awm thei te pawh ruahman mek a ni, a ti a. Kawng bal avanga khawchhung mipuite harsatna te pawh a hriatthiampui thu a sawi a. Leitlahniam a hmuna endiktu DDMA, DM&R, PWD leh Geology & Mineral Resources atanga Official ten an thil hmuhdan te an thlirho leh hnuin a tul anga hmalak a ni dawn tih a sawi bawk.


Sawrkar hmalakna tarlang
    Sports Minister, Robert Romawia Royte chuan nimin khan Lunglei-ah thuthar thehdarhtu-te kawmin a Department chan hrang hranga an hmalakna te a tarlang a. Heng zingah hian Lunglei khawpuiah 2nd Mizo Battalion NCC thar din a nih dawn thu te, Lunglei-ah District Sports Complex din tum a nih thu leh cheng nuai 4919.31 approval hmuh a nih tawh thu te, Mizoram State Sports Academy chu Zobawk-ah din tum a nih thu te, Astro Turf Hockey Ground din tum a nih thu te, Electric Veng Field-ah phullem phah tum a nih thu leh Standard Futsal Grounds pahnih din tum a nih thu te a sawi bawk.

VC by-Election nei dawn
    Mara Autonomous District Council (MA-DC) huamchhunga Village Council 8-ah thla thar Nov. 10 khian by-election nei turin State Election Commission chuan nimin khan a puang a, inthlan chuh tumte tan tun thla ni 20 thleng hming pekluh theih a ni ang.

ZORO in Assam an dem
    Zo Reunification Organisation (ZORO) chuan tunhnaia Assam sawrkarin Mizoram ramri a nek chiam mai chu Tualto hnamte chanvo (indigenous peoples rights) pawng nekna diklo tak nia an ngaih thu thuchhuah siama tarlangin, pawi an tih thu leh Assam sawrkar an dem thu an sawi a. “Kan ramri hi a nih danphung chiang taka kan hriat a, kan pawmpui a nih loh chuan tu sawrkar mahni an sawn in an nek thiang lo a ni,” tiin hetianga Assam-in min pawng nek thar chiam chungchanga sawrkar hmalakna leh mipui lungrualna ah lawmthu an sawi bakah lungrual taka ding zel tura an duh thu an sawi bawk.

Intuaitharna hun hmang
    Govt. Serchhip College-a Faculty te tan nimin khan an College-ah Internal Quality Assurance Cell (IQAC) leh Faculty Development Committee, Govt. Serchhip College buat-saihin intuaitharna hun, Faculty Development Programe hman a ni a, he hun hi College Principal, PC. Lalremsiama chuan kaihruaiin Resource Person, Prof. Lalbiakdiki Hnamte, Director, College Development Council, Mizo-ram University chuan ‘Enhanced Teaching and Learning Techniques” tih thupui hmangin zirtirna pein Zirtirtute tana hriat tur pawimawh hrang hrangte a zirtir a ni.

SWD Minister in tlawh
    Social Welfare Department Minister, Dr. K. Beichhua chuan nimin khan Zoram Medical College (ZMC)-a zirlaite tana Tribal Girls Hostel sakna hmun tur a enfiah. Social Welfare Minister hian Tribal Girls Hostel bakah Social Welfare Department-in Ministry of Social Justice & Empowerment atanga rilru lama harsatna nei, enkawltu neilote awmna tur an sakna hmun turte a en nghal bakah Tribal Research Institute, Social Welfare & Tribal Affairs hnuaia sak mek a tlawh nghal bawk. Tribal Research Institute hi Tribal hnam nungphung zirbing miten an zir theihna atana ruahman niin, building sak dan pawh Zawlbuk pian-hmanga sak a ni a, Library, Museum leh Guest House te dah tum a ni a, a sak nan Ministry of Tribal Affairs atangin cheng vbc. 20 hmuh a ni.

India-ah hri kai tlem zel
    Darkar 24 kalta chhungin India ramah COVID-19 hri kai hmuhchhuah tlahniamin hri kai 55,342 hmuh an ni a, mi 77,760 enkawl dam an ni bawk. India ramah hian darkar 24 kalta chhung khan sample 10,73,014 enfiah niin hri kai 55,342 hmuh thar leh an ni a, heti hian India rama Sample enfiah zat chu 8,89,45,107 niin hri kai hmuh tawh chu 71,75,880 an tling ta a, heng zinga mi 62,27,295 te chu enkawl dam ni tawhin hri kai hmuh atangin zaa 86.78 te chu enkawl dam an ni tawh a ni.
    Tunah hian India ramah COVID-19 hri kai enkawllai 8,38,729 la awmin hei hi hri kai hmuhchhuah atangin zaa 11.69 an ni a, hri kai hmuhchhuah zingah mi 1,09,856 ten nunna chan tawhin hei hi hri kai hmuhchhuah atangin zaa 1.53 an ni.
    Thla kalta khan India rama hri kai an hmuhchhuah hi sing kua te a tlin laiin tun thla ah erawh hri kai hmuhchhuah hi an tlahniam hret hret mek a ni.

Comments

Popular News (Last 30 Days)