Kum 2019-ah tualthah thubuai 22 ziahluh a ni

Mizoram Police te chuan nikum 2019 chhung khan tualthah thubuai 22 leh tualthah tum thubuai 13 an ziaklut.

Mizoram Police hian nikum chhunga tualthah thubuai an ziahluh zingah hian Aizawl District-ah thubuai ziahluh tam berin thubuai 8 ziahluh a ni a, Aizawl hi Mamit leh Champhai District chuan dawtin 4 ve ve ziahluh a ni a; Serchhip, Lawngtlai leh Siaha District-ah 2 theuh ziahluh a niin Kolasib leh Lunglei District-ah tualthah thubuai ziahluh a awm lo thung a. Tualthah tum thubuai hi Aizawl District-ah 5 ziahluh niin a tam ber bawk a, Champhai leh Lunglei District-ah 3 ve ve ziahluh niin, Mamit leh Serchhip District-ah pakhat ve ve ziahluh a ni bawk a, Mamit, Kolasib leh Lawngtlai District-ah a awm lo thung a ni. Kum 10 kalta chhung khan kum 2010 chu tualthah thubuai ziahluh tam ber kum niin thubuai 46 ziahluh a ni a, kum 2014-ah thubuai 45 ziahluh a ni bawk.

Statistical Abstract of Mizoram 2019-in a tarlan danin nikum chhung vek khan Mizoram District hrang hrangah pawngsual thubuai 42 zet ziahluh a ni bawk a, Aizawl District-ah pawngsual thubuai ziahluh tam berin 16 zet ziahluh a ni a. Kolasib leh Lunglei District-ah thubuai 5 ve ve ziahluh niin, Mamit, Champhai leh Lawngtlai District-ah 4 theuh leh Serchhip leh Siaha District-ah 2 ve ve a awm a ni. Kum 10 kalta chhungin kum 2014 chu pawngsual thubuai ziahluh tam ber kum niin thubuai 125 zet ziahluh a awm a, kum 2012-ah thubuai 102 ziahluh niin thubuai ziahluh tlem ber kum , kum 2017-ah thubuai 25 ziahluh a ni.

Nikum chhunga Mizoram Police ten IPC hnuaia thubuai ziahluh zingah hian rukruk thubuai ziahluh chu a sang fal hle a, thubuai 1059 ziahluh niin In rawk thubuai 643 chuan a dawt a ni.