P&E Minister in Thinghlun a ramri Duty te a tlawh

P&E Minister, R. Lalzirliana chuan nimin khan Assam leh Mizoram inrina, Thinghlun khua tlawhin ramri-a duty-te chu ram leh hnam hum-halh nana duty an nih angin theihtawp chhuah zel turin a sawm.

Nimin a Thinghlun tlawhtu P&E Minister hian Thinghlun khawtlang hruaitute hma-ah tunhnaia Mizoram leh Assam ramri-a buaina kan tawh ah Thinghlun khaw mi ten harsatna an tawk chu pawi a tih thu sawiin, hei hi Thinghlun khawtlang tawrhna mai ni lovin Mizoram pum tawrhna leh harsatna a nih thu a sawi a. Ramri-a duty-te chu ram leh hnam humhalh nana duty an nih angin theihtawpchhuah zel turin a sawm a. Kan pi leh pu te atanga kan hmunhma lo luah thin chu humhalh a tul thu sawiin, Mizo nun ze mawi chhawmnungtu ni zel turin a chah a. Discipline tha tak nena Sipai duty a hmuh chuan a tih lawm thu leh thlamuanthlak a tih thu sawiin, mamawh an nei a nih chuan inthlahrung lova thuneitute hnena thlen zel turin a chah bawk.

Minister hian Assam ramri-a Sipai duty nunna chan an awm a nih chuan Mizoram Sawrkar chuan Ex-Gratia cheng nuai 35 a pek dawn bakah an Pension thlengin an thla hlawh pangngai chu an nupui fanau te'n an lak dawn bakah an chhungte eizawnna tur Sawrkarin a theih ang anga a ngaihtuahsak dawn thu a sawi a. Ramri-a Sipai duty-te awmna hmun thleng hian Kawlphetha changtlung taka an hmuh theihna turin ban phun a nih dawn thu a sawi bakah Duty-te tan hian Water Cooler, Sintex leh Refrigerator a pe a ni. 

Hei bakah hian Thinghlun khawtlang tan an khaw VCP hnenah Rs. 10,000/- pein, Langkaih Group YMA tan Rs. 10,000/-Thinghlun MHIP tan Rs. 5,000/- leh IR Duty-te chawhmeh man atan Rs. 5000/- a hlan nghal bawk a. Kanhmun Medili boruak thlithlaiin Minister hian a tlawh nghal bawk a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn