Football zirna E-Pathshala hawn a ni

All India Football Federation (AIFF) leh Sports Authority of India (SAI) tangkawpin kum 18 hnuailamte tana Online hmanga Football an zirna tur an buatsaih, E-Pathshala chu nimin khan Mizoram-a kalpui turin Mizoram Governor, P. Sreedharan Pillai chuan a hawng.

Video Conference hmanga hawnna hun buatsaihah hian Mizoram Governor chuan naupan lai atanga Football zirna kalpui tha a tih thu leh AIFF leh SAI-in hetiang hun an buatsaih chu tha a tih thu a sawi a, naupangin hma an sawnpui ngei a beisei thu a sawi bawk.

Thusawitu dang Sports & Youth Services Minister, Robert Romawia Royte chuan Mizoram-ah Football-in nasa taka hma a sawn thu a sawi a, hmasawn tir zel tuma sawrkarin tan a lak thu leh, infiamna hmunhma tha zawk siam belh tura ruahmanna a neih dante a sawi a, AIFF leh SAI hmalakna chuan hna tha a thawh a rin thu a sawi bawk. he hunah hian E-Pathshala kalphung te sawifiah niin sawrkar aiawh bakah MFA aiawhte pawh an tel bawk a ni.

E-Pathshala chu eng nge ni? :

E-Pathshala hi website a ni a, hetah hian naupang kum 18 hnuailam mipa leh hmeichhia a duh apiang an inziak lut thei ang. 'Athlete Coaching Program in Football for Grassroots and Intermediate' tih a ni a, Football kaihhnawih kawng hrang hranga inzirtirna, inawmtleina, hmasawnna tura thiam thil haichhuahna, naupangin awmze neia Football an buaipui theih dan tur leh naupang thiamna haichhuahna tura duan a ni.

COVID-19 avangin naupangin sikul an la kal lo a, khelmual-a chhuaha inkhelh a la remchang vek lo deuh bawk a, hetiang hunah hian In atanga an kalpui theih, Football lama hmasawnna tura mithiamte duan a ni. E-Pathshala hi chi thum-ah then niin My Football Culture, My Skills leh My Training tia then a ni.

‘My Football culture’ tih hi hmun nga-ah an then sawm leh a, chutah chuan My Drawing, My Goal, My Idol, My Creativity and My Story tihte a awm a, naupangin an tih tur hrang hrangte a awm hrang thliah a, hengte hi nuam ti tak chungin an kalpui thei anga, heng Video te hi an upload leh thei dawn a ni.

‘My Skills’ hi chu kum 12 hnuailam tana tih a ni a, an thil tih tur hi a harsat dana zirin - Golden Bracket, Silver Bracket leh Bronze Bracket tiin then sawm a ni. Heng hnuaia tih tur a phut hrang hrangte an tih hnuah chutiang thil an tilai video chu upload leh tur a ni.

‘My training Section’ hnuaiah hi chuan an Football khel lai leh zirlai video hrang hrang an uoload thei a, team-a an khelh mai ni lo thianho a an inkhel leh chhungkuaa an inkhel laite pawh upload theih a ni bawk ang.