Hri leng kara inkaihhruaina thar tihchhuah niin Sakhaw biakna hmuna punkhawm huaihawt phal ala ni lo

Hripui leng avanga inkharkhipna atanga inthlahdulna chu Vawiin atang hian kalpui chhunzawm zel ala ni dawn a, tun thla ni 31 thlenga hman tur ‘unlock’ inkaihhruaina nimin-a tihchhuah thar ah thil danglam lutuk awm lovin zan lama pawnchhuah khapna kalpui zui zel tur niin Sakhaw biakna hmunah mipui punkhawmna huaihawt phal ala ni dawnlo bawk.

Hripui leng avanga inkharkhipna kalpui thlahdul mekah hian Vawiin atanga tun thla ni 31 thleng hman turin inkaihhruaina thar tihchhuah leh a ni a, he kaihhruaina thar ah hian Mizoram luhchhuahna Bairabi, Kanhmun, Khawkawn, Vairengte leh Zokhawthar kaltlang kawngpuite chu bungrua leh khualzin phur lirthei tan hawn a ni dawn a, Lengpui Airport pawh hawn chhunzawm a ni ang. Mizoram-a lo lut reng reng chu Entry Point-ah uluk taka Screening kalpui chhunzawm zel a ni anga, sawrkar Pisa te pawh hawn chhunzawm tur niin kaihhruaina siam a ni leh bawk.

District Hqrs. ah te chuan zan dar 8:00 atanga zing dar 4:30 inkarah pawn chhuah khap zui zel a ni dawn a, phalna nei lova vantlang hmuna mi 5 (panga) aia tam awmkhawm khap chhunzawm a ni bawk ang. Loh theih loh thil anih loh chuan kum 65 chin chunglam te, taksa hriselna lama harsatna nei sa te leh kum 10 hnuailam te chu pawn chhuah loh hram tur a ni a. Vantlang/puipunna hmun, Dawr, Office, Damdawi In leh hmun danga chhuak tur ten Mask vuah ngei ngei tur niin midang nena awmhona-ah Mask vuah ngei tur a ni bawk.

School, College, Educational leh Coaching Institution-ah Online Distance Learning kalpui chhunzawm theih a ni dawn a, Containment Area pawnah chuan pawl 9 atanga pawl 12 zirlaite chu anmahni duhthlanna-in an nu leh pa/Guardian te phalna ziakin an zirtirtute rawn turin sikul an kal thei ang. Sakhaw biakna hmunah te mipui punkhawmna huaihawt phal a ni lova, Zing tawngtai inkhawm leh Committee/Rorel inkhawm erawh chu mi 50 (sawmnga) aia tam lo tan neih phal niin heng inkhawmnaah hian zaiho khap a ni.

Mipui ten a hmuna an en theih tur Games & Sports Tournament huaihawt phal a ni lova, Games & Sports practice erawh neih phal niin mi 25 aia tam punkhawm khap a ni a. Mitthi vuina, lungphun, inneihna leh pawl thil-a punkhawm ah mi 50 aia tam punkhawm khap a ni bawk.

Comments

Chhiar Hlawhte