DDUGKY hnuaia training te Alumni Suppport sem

Mizoram State Rural Livelihoods Mission (MzSRLM) hmalakna in nimin khan sawrkar laipui Scheme, DDU-GKY hnuaia thalai training zo tawh leh hna hmuhsak tawhte tan Alumni Suppport Rs. 8,28,000/- chu semchhuah a ni.

Alumni Support hi Deen Dayal Upadhyaya Grameen Kaushalya Yojana (DDU-GKY) hnuaia thiamthil hrang hrang zirchhuak tawh, COVID-19 hripui avanga an hnathawh chhunzawm thei lova Mizoram-a rawn haw te hnenah an mamawh zual phuhruk nan pek a ni a. Anni bakah DDU-GKY hnuai veka zirchhuak, hripui kara hna la thawk chhunzawm mek te hnenah nan pek a ni bawk.

Alumni Support hi Rural Development Minister, Lalruatkima Pisa-ah semna hun hi hman niin he hunah hian RD Minister chuan MzSRLM hmalakna hnuaiah sawrkar laipui scheme DDU-GKY kalpui niin, thingtlang thalaite tan hmasawnna thlentu ropui tak a ni tiin, thiamna leh eizawnna tha tak tak an hmu chho mek a ni, a ti. He hmalakna hmang hian thingtlang thalaiten eizawnna an neih theih nana kawng kawhhmuha, chherchhuah bakah enkawl zui zel tum a ni, a ti bawk.

RD Minsiter chuan DDU-GKY hnuaia Training chhuak tawh thalai tam tak eizawnna hmuhsak an ni tawh tih pawh sawiin, vanduaithlak takin hripui leng avangin tam takin an hna an chan a, mahni khuaah tlan haw a ngai ta tih a sawi a, heng harsatna tawk mekte tana tanpuina sum, Alumni Support pek an ni chu lawmawm a tih thu a sawi a. Hna chan ta tam tak an awm laiin hripui leng karah pawh mahni chhungte chawmna tura thawk chhunzawm engemawzat an la awm thu pawh sawiin, chung mite tan pawh anmahni fuihna turin sum pek chhuah a nih thu RD Minister hian a sawi bawk.

Sawrkar laipui Scheme DDU-GKY hi Mizoram-ah chuan MzSRLM hnuaiah kalpui a ni a. A tum ber chu thingtlang thalai kum 18-35 ten eizawnna an hmuh theih nana training pek a ni a. Training hi Project Implementing Agency (PIA) te kaltlanga buatsaih niin an zirchhuah hnuah pawh hna an zawnpui thin a ni. Tun thlengin he hmalakna hnuaiah hian mi 544 te training pek an ni tawh a, mi 290 hna hmuhsak an ni tawh bawk.

Nimin-a sem chhuah tak Alumni Support pawh hi PIA te hnenah sem chhuah niin anni hian an hnuaia trained chhuak candidate mi pakhat zel tan Rs. 4000/- theuhin an sem ve leh chhawng dawn a. Pianphunga rualbanlo candidate pakhat hnenah Incentive pawisafai leh thuziak certificate pek a ni bawk. Nimin a he hun hman hi RD Commissioner, Lalhmingthanga chuan kaihruaiin, MzSRLM CEO, Lalchhandami chuan an hmalakna te a tarlang bawk a ni.

Comments

Chhiar Hlawhte