Bialtu MLA disqualify tur hek pawi tih thu an sawi

Zoram People’s Movement (ZPM) Party Serchhip leh Thenzawl Block Thalaite chuan Serchhip Bialtu MLA, Lalduhoma a MLA-pui 12 ten Disqualify tuma hekna an thehlut chu pawi an tih thu sawiin, “Serchhip Bial mipui zah-lohnaah kan ngai a, kan dem tak zet a ni,” an ti.

Nimin-a thuchhuah an siamah ZPM Party Ser-chhip leh Thenzawl Block Thalaite hian ZPM leh mipui ten Serchhip bialtu MLA atana duh taka an thlantlin Lalduhoma’n Serchhip Bial leh Zoram tan a theihna leh finna te hmanga theihtawp chhuaha hna a thawh lai leh an chhuan em em laia a MLA-pui 12 ten amah thlang tlingtu Serchhip bial mipui leh ZPM te ngaihtuahna nei miah lova Disqualify tuma hekna an thehlut chu pawi an tih thu tarlangin, “Serchhip Bial mipui zahlohnaah kan ngai a, kan dem tak zet a ni,” an ti.

Lalduhoma’n amah thlangtlingtu Serchhip Bial mipui tan thahnem ngai taka a theihna kawng kawngah theihtawp a chhuah lai leh, Zoram mipuite langtlang taka sawrkar hmalakna te min hrilh hriat laia, a thlangtu pawh nilo heng Ruling MLA 12 rualin an hek chu Serchhip Bial mipui zahlohna leh rah beh tumna, hmusitna leh Zoram hmasawnna daltu ah an ngai tih an thuchhuah ah hian an tarlang bawk.

Hei bakah hian ZPM Party Serchhip leh Thenzawl Block Thalaite chuan Serchhip Bialtu MLA hekna ah hian dik tak leh fel taka rorel ni se tih an thuchhuah ah hian tarlangin, Serchhip Bial mipui leh Bialtu Lalduhoma ti buai tawh lo tur leh, he thu lungchhiatthlak tak leh Zoram nghawr nghing thil thleng mek hi tawp tawh se, tun chinah hetiang hi thleng tawh lo se an ti hle tih an tarlang a. Serchhip bialtu MLA chungah hian eng pawh thleng se, amah leh hma-ngaih taka a enkawl Serchhip bial mipuite tan Zoram mipuite khawngaihna leh tawngtaipuina an ngenpui tak meuh tih pawh an thuchhuah ah hian an tarlang bawk.