Serchhip-ah Bawrhsap hovin mahni-a eizawnna kawng dap dan tur zirhona neih a ni

Mizoram Handloom & Handicrafts Development Corporation Ltd. (ZOHANDCO) buatsaihin nimin khan Serchhip-a BNRGSK Hall-ah ‘Handloom, Handicrafts, Food Processing Agro Based Poultry Awareness and Seminar’ neih a ni a, he hun hi District Bawrhsap, Kumar Abhishek chuan khuallian niin a hmanpui a ni.

BNRGSK Hall, Serchhip P&E Veng-a ‘Handloom, Handicrafts, Food Processing Agro Based Poultry Awareness and Seminar’ ah hian District Bawrhsap, Kumar Abhishek chuan Mizoram a cheng mek mi tam zawk chu kum lama thalai zawk an nih thu sawiin, zirtirna dik leh kawhhmuhtu tha tak an awm anih phawt chuan mahni kut ke ngei-a eizawnna lamah Mizoram chuan hma hun eng tak a neih thu leh tun hun hi tanlak hunlai tak a nih thu a sawi a. Khawvel changkang zelah mahni kut ke-a dinga mahni puala eizawnna kapui turin khawvel changkanna chu hmanthiam a tul thu a sawiin, Mizoram chu tlangram anihna te leh kan thil siamchhuah, a hralhchhawn leh kawnga kan sawngbawl zui dante chuan duhthu ala sam lo tih pawh a sawi a. Kan kutchhuak, kan thil siamchhuah te chu nalh tak leh mi tana mit la thei tura kan sawngbawl zui a ngaih thu leh hemi lamah tanlak a ngaih thu sawiin, chumi atana Serchhip hmunah Seminar buatsaih a ni chu lawmawm a tih thu leh rah tha tak a chhuah ngei a rin thu a sawi bawk.

National Schedule Caste/Schedule Tribe Hub (NSSH) Scheme hnuaia buatsaih he Awareness leh Seminar-ah hian ZOHANDCO Chairman, C. Lalrammawia chuan India ram Prime Minister, Narendra Modi chuan October 16, 2016 khan National Schedule Caste/Schedule Tribe Hub (NSSH) hi hawngin, Ministry of Micro, Small & Medium Enterprises (MSME) Flagship Programe niin, National National Small Industries Corporation hmalakna hnuaiah hmalakna kalpui a nih thu a sawi a, he Programe hian SC/ST te zinga sumdawnna chawisana, Public Procurement-ah SC/ST te enkawl MSE nasa taka hmasawn tir a tum thu a sawi a. Mizoram-ah pawh Commerce & Industries Department in Central-a Proposal an thehluh chu lo pawmsakin, MSME sum bultumin NSSH programe chu hman theih anih thu a leh Implementing Agency atan ZOHANDCO chu hman anih thu a sawi bawk.

Nimin-a he Awareness leh Seminar-ah hian Handloom and Handicraft Sector chung-changah K. Lalmuanpuii chuan zirtirna pein Handicraft chungchangah Lalsiamthara chuan zirtirna a pe bawk a, Agro Based (Poultry) chungchang ah Andy Lalhmachhuana, Agro East India (Poultry) chuan zirtirna pein Food Processing Sector-ah Henry Saingura, Food Technologist leh Mark Lalduhsaka ten zirtirna pein Serchhip khawpui chhung atangin mahni-a eizawnna din kawnga hmalak tum mi thahnem tak an tel a ni.