Serchhip Bial-a Polling Station siam belh tur chungchang sawihona Bawrhsap hovin neih a ni

Serchhip District Level Standing Committee on Electoral Roll chu nimin khan thukhawmin Serchhip Assembly Constituency huamchhunga awm, New Serchhip huamchhunga Polling Station siam belh chungchang an sawiho.

Serchhip District Election Officer leh District Level Standing Committee on Electoral Roll-a Chairman ni bawk, Kumar Abhishek kaihhruaia DC Meeting Hall-a thutkhawm ah hian District Election Officer chuan Election Commission of India chuan mipuiten kokim taka vote an thlak theih nan Polling Station pakhat chhungah Voters awm tam lutuk lo turte, mitin tan Polling Station a hlat loh theih nan te ruahmanna a siam thu a sawi a. Chu ruahmanna bawhzui chuan Serchhip District chhungah pawh Polling Station siam belh ngai kan neih te, kumtin a tahtawla siamrem chhoh thaa hriat a nih thu sawiin, tuna New Serchhip Area-a Polling Station siam belh pawh hi chumi hmalakna pakhat a nih thu a sawi bawk.

He hunah hian Election Officer, Vanlalhmachhuana chuan hemi atana an hmalak dan te tarlangin, Serchhip District-ah hian Polling Station thendarh ngai paruk vel a awm mek thu a sawi a. Election Commission of India chuan Polling Station pakhatah Voters 1500 aia tam awm lo thei se a duh a, tuna New Serchhip thendarh tura rawt chhungah hian voters 1200 vel an awm a, inthlanpui a lo thlen leh meuh chuan an kumtin pun chhoh dan atanga chhutin voters 1500 an pel thei dawn a ni, tiin New Serchhip chungchang hi a sawifiah a. Kumleh lamah hetiang dinhmun a ding veng leh khaw dangte pawh siam chhoh zel a tul tur thu a tarlang bawk.

He Meeting hian 26/23 New Serchhip-I, Govt. M/S Polling Station chu 26/23 New Serchhi- I leh 26/24 New Serchhip-II ah thendarh ni se tiin a rel a, New Serchhip-I P/S chuan Agriculture & Sericulture Complex, Kikawn leh Sihphir Veng te huamin voters 480 vel an awm anga, Polling Station atan North Branch YMA Hall an hmang ang. New Serchhip-II P/S chuan  Bazar, Luiralmawi leh Khawtetlang a huam anga, Voters 550 vel awmin Govt. M/S chu Polling Station ah a ring zui ang.

26/25 New Serchhip-III atangin 26/26 New Serchhip-IV leh 26/27 New Serchhip-V ah then chhuah ni se tiin a rel bawk a. 26/26 New Serchhip-IV chuan Venglai chin zawng huamin voters 542 an awm anga, Polling Station-ah Brilliant HSS an hmang ang. 26/27 New Serchhip-V chuan Bilzel, Police Veng, Tlangnuam Veng leh IOC Veng chin a huam anga, voters 663 awmin Polling Station-ah PCR H/S an hmang ang. heng Polling Station siamthat turin a khawih ve loh New Serchhip-II Polling Station huamchhung ami te chu 26/25 New Serchhip-III an ni ve tawh thung ang. Heng rawtna te hi Mizoram Chief Electoral Officer (CEO)-a thlenin Election Commission of India-ah thlen leh tur a ni dawn a ni.

Comments

Chhiar Hlawhte