Hri kai 46 hmuh belh leh

Niminpiah-a Mizoram-a Sample enfiah atangin COVID-19 hri kai mi 46 zet hmuh leh an ni a, an zinga tam zawk chu Aizawl khawpui Veng hrang hranga hri kai hmuh te an ni.

Niminpiah khan ZMC Laboratory-ah Sample 286 enfiah niin heng atang hian COVID-19 hri kai mi 40 zet hmuhchhuah leh an ni a, heng hri kai hmuh-chhuah zinga mi 12 te chu State pawn atanga lo lut leh inkhunghranna hmuna awm te niin midang te hi Aizawl khawpui chhung Veng hrang hrang mi an ni. Niminpiah vek khan Rapid Antigen Test hmangin hri kai mi 6 hmuh an ni bawk a, Aizawl khawpui chhung Veng 5 ami te an ni bawk.

Heti hian nimin thleng khan Mizoram-a COVID-19 hri kai hmuhchhuah chu mi 2493 an tling ta a, an zinga mi 2209 te chu enkawl dam ni tawhin tunah hian hri kai enkawllai 284 an awm mek bawk a ni.

India-ah hri kai enkawl dam an pung chho zel

S India rama COVID-19 hri kai hmuhchhuah atangin zaa 90.23 te chu enkawl dam an ni tawh a, hri kai enkawllai chu zaa 8.26 an ni thung. India ramah hian darkar 24 kalta chhung khan CO-VID-19 hri kai mi 59,105 te chu enkawl dam leh niin heti hian nimin thlenga hri kai enkawl dam chu mi 71,37,228 an tling ta a, hei hi India rama hri kai hmuhchhuah tawh zawng zawng atangin zaa 90.23 niin nitin hri kai enkawl dam hi an pung chho zel a ni. Darkar 24 kalta chhung khan India ramah Sample 90,39,309 enfiah leh niin heng atang hian COVID-19 hri kai hmuhchhuah thar 45,148 an awm a, heng te nen hian India rama hri kai hmuhchhuah chu 79,09,959 tling tawhin tunah hian hri kai enkawllai 6,53,717 an awm mek a, hei hi hri kai hmuhchhuah atangin zaa 8.26 a ni a, nimin thleng khan hri kai zingah nunna chan 1,19,014 awmin hei hi hri kai hmuhchhuah atangin zaa 1.50 a ni bawk.