Serchhip-a Hri kai te chhuizuina ah hri kai dang mi 8 hmuhchhuah belh leh an ni

Niminpiah lam-a Serchhip-a COVID-19 hri kai hmuhchhuah mi pahnih te lo kawm hnaih chhui zuina kal zelah Serchhip-ah COVID-19 hri kai mi 8 hmuh belh leh an ni.

Niminpiah lamah Serchhip-ah Rapid Antigen Test hmanga COVID-19 hri kai mi pahnih hmuh thar ten an lo kawm hnaih te chhui zui hna chu thawh nghal niin niminpiah khan an lo kawm hnaih zual te Sample chu lak sak nghal niin nizan hmasa zankhua khan Serchhip District Hospital TrueNat Laboratory-ah heng Sample te hi enfiah nghal a ni a, heng bakah hian Rapid Antigen Test hmangin Sample thahnem tak enfiah nghal ni bawkin heng atang hian nimin khan Serchhip-ah COVID-19 hri kai mi 8 hmuh belh leh an ni

Nimin a Sample enfiah atanga hri kai hmuhchhuah mi 8 zinga mi 5 te hi Serchhip Chanmari Veng ami te niin an zinga mi pahnih te hi niminpiah-a hri kai hmuhchhuah tawh pakhat te nen In pakhat-a cheng niin midang pahnih te hi pafa niin nimin-a hri kai tawh te nen chhungkhat hnaivai tak, an makpa leh a fa an ni a, midang pakhat chi Chanmari Veng-a Dawr nghaktu niin ani hian hri a kaina chhan hi chiang taka hriat theih a ni lova, heti hian Chanmari Veng atanga hri kai hmuhchhuah hi mi 6 an ni ta a ni.

Serchhip P&E Veng-a hri kai hmuhchhuah chhuina kal zelah nimin khan hri kai mi pathum hmuh an ni bawk a, heng hri kai hmuhchhuah te hi niminpiah-a hrin kai hmuhchhuah tak pasal leh an fa bakah an chhungte hnaivai, building pakhat-a khawsa an ni a, P&E Veng-ah hian hri kai mi 4 hmuh an ni ta bawk a ni.

Serchhip khawpui chhunga hri kai hmuhchhuah an pun lai hian Serchhip District-a hri kai hmuhchhuah pakhat chu nimin khan enkawl dam niin tun thlengin Serchhip District-a hri kai hmuhchhuah chu mi 76 an ni tawh a. Serchhip CMO Office tanga thu kan dawn danin nimin-a Serchhip District-a COVID-19 hri kai enkawl dam tak hi tun thla ni 9-a Serchhip District-a COVID-19 hri kai hmuhchhuah niin mipa kum 27 mi, West Bengal atanga rawn lut a ni a, Prem Kram Infracon Pvt. Ltd. a thawk a ni a, hri a kai tawhloh tih hmuhchhuah a nih hnuah nimin khan Chhiahtlang Tourist Lodge CCC atangin chhuahtir a ni. Heti hian nimin thleng khan Serchhip District-a COVID-19 hri kai hmuhchhuah chu mi 76 an tling ta a, an zinga mi 65 te chu enkawl dam ni tawhin tunah hian hri kai enkawllai mi 11 awmin an vaiin COVID-19 hri kai enkawlna tura sawrkar in a ruahman ah enkawl vek an ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn