Hmeichhe chunga chet dan an dem thu an sawi

MHIP General Hqrs. chuan mipa te zingah hmeichhe chunga mawilo taka che duh an awm leh thin chu pawi an tih thu leh hetiang thil hi thleng tawhlo se an duh thu an sawi.

Nimin-a thuchhuah an siamah MHIP General Hqrs. chuan tunkar Thawhtanni zan-a Sakawrdai Doctor, Dr. JH. Vanlalnunmawia S/o JH Vanlalnela, Ramhlun North, Aizawl in Sakawrdai nula pawng-sual tum leh thah-ah hial te vau-a a chunga mawilo taka a che chu thinrimthlak an tih thu leh hmeichhia te zahawmna humhimsaktu tur leh an thlamuan-pui tur zawk mipa te hetianga hmeichhe chunga mawilo taka che duh an awm leh thin chu pawi an tih thu sawiin, hetiang thil hi thleng tawhlo se an duh thu an sawi a. Sakawrdai nula in huaisen taka a zahawmna humhim tura a chet dan chu ropui an tih thu leh an fak thu pawh sawiin, he thil thleng hi Police te pawhin bawhzuia pawi khawihtu Doctor rang taka man nghal a ni chu an lawm thu an sawi bawk.

He thil thleng chungchangah hian Sakawrdai Joint YMA leh MHIP bakah MUP leh Hmar Student Association, Sakawrdai Unit te chuan thuchhuah intawm siamin Dr. JH. Lal-nunmawia'n hetianga Sakawrdai nula mawilo taka khuaikhem a tum leh nunna lak hial tuma thlabar taka a siam chu rilru natthlak an tih thu an sawi a. Hetiang thil hi thleng nawn tawhlo se an duh thu leh thilsual ti tu hi a na thei ang bera hremna pek an phut thu pawh sawiin, Sakawr-dai CHC-a Doctor hi thlaka mipuiin an thlamuanpui theih tur Doctor dah an beisei thu an sawi bawk.

Darlawn-a JERACOM Drop-in-Centre pawhin an thawhpui in hetiang vanduaina a tawk chu pawi an tih thu sawiin, an thawhpui nula dikna leh zahawmna humhim a nih theih nan a tawp thlenga hmalak an tum thu thuchhuah siamin an tarlang bawk.