Chief Minister Office Conference Hall-a he thutkhawm ah hian Chief Minister chuan kan thalai te zingah Central Service-a lut an tlem tulh tulh avangin tan lak a tul thu a sawi a. State thalai te India ram zau zawka rual el pha, rual khum pha an nih theih nan tun atanga tan lak kan ngai hlawm a ni, a ti. Chief Minister chuan tunah Delhi a zirna tur kawng inhawn sak tumna chu tha a tih thu sawiin, thalai te hmakhua ngaihtuah chungin Central leh State-ah te thuang hrang hranga sawrkar chuan hma a lak sak tur thu a sawi a. Ruahmanna an siam te chu tih hlawhtlin a nih theih nana thalaite sang tak thleng thei tura chherchhuak tur chuan sum pawh a remchang ang ang hman a nih tur thu a sawi bawk.
He thutkhawm a tel te hian tuna Union Public Service Commission (UPSC) buatsaih Central Service Exam Prelims leh Mains a inziak tlingte tana Cash Incentive Award siam leh, Coaching Academy te nen tangkawp a Crash Course siam bakah hian thalai thahnem ngai, tlin tum tak tak te puihna turin Delhi-a Coaching Academy tha tak tak te nen thawkho a, a hmun-a an zirna tur leh an zirchhunga an awmna tur te puihna tur, Full Scholarship siam an rel a. Scholarship hmu tura Exam buatsaih dan tur te, Seat siam zat tur a rua-hmanna pawimawh dangte chu siam thuai ni se tih a ni.
Nimin a thutkhawm ah hian LESDE Minister, Lalchhandama Ralte leh Mizoram Youth Commission (MYC) Chairman, Dr. Van-laltanpuia bakah Mizoram sawrkar-a Finance Commissioner, Planning Commissioner, LESDE Special Secretary, GST Joint Commissioner, Economics & Statistics Director leh MYC Member leh Official te an tel a ni.
Chief Minister, Zoramthanga hova nimin-a Labour Employment, Skill Development and Entrepreneurship (LESDE) Minister leh MYC Chairman te thukhawm chuan Central Service-ah Mizoram thalai tam zawk an tlin chhoh theih nan Delhi-a Coaching kal turin Full Sponsorship siam an rel.
Comments
Post a Comment