Hunthar Veng lei tlahniam DM&R Minister in a tlawh

Disaster Management & Rehabilitation Department changtu Minister, Lalchamliana chuan tukin khan tunhnaia ruahsur nasa avanga Hunthar, Chanmari West leh Vaivakawn Veng hmun thenkhata lei tlahniam thar te chu a hmunah kalin a enfiah.

DM&R Minister hian Hunthar Veng huamchhunga NH-54 lei tlahniam a endik pah hian helai area dawlna atana Mizo-ram State sum cheng nuai 500 chuang senga PWD (Highway) hna thawh mek te chu a bialtu Engineer te a sawipui a. Hna thawktute chu theih-tawp chhuah zel tur te, tha tak leh rang zawka thawk turin a chah a ni. Hemi hnuah hian Vaiva-kawn atanga Chanmari West panna kawng tlahniam te en lehin a siamthat hna thawk mektu PWD te rua-hmanna ngaithlain a hma lak zel dan tur a sawipui a, lei tlahniam leh tawlh venna atana Geologist te thurawn a sawi pui bawk a ni.

DM&R Minister chuan Chief Minister pawhin helai huamchhunga mipuite harsatna tawh hi a hre reng tih sawiin, helai hmun lo tlawh tur hian Chief Minister nen an sawi dunna atanga hma la a nih thu a sawi a, NDMA atangin mithiam pahnih ten Oct. ni 26 ah helai hmun en tur hian an rawn kal dawn tih a sawi bawk.

Hunthar Veng huamchhunga lei tla-hniam siamthatna atan hian DM&R Department hnuaiah ruahmanna siamin NDMA kaltlangin pawisa cheng vbc. 10 vel rawn pek a ni a. Tunah hian hna hi thawh reng niin COVID-19 leh Fur ruahsur hian nasa takin hna a ti khaihlak tih a hna thawk mektu ten an sawi a. Tunhnaia helai bawr chet leh avang hian In 27 vel bawr chu thiah tura tih niin PWD (Building) lamin Estimate siamin DC, Aizawl/Chairman, DDMA hnenah an thehlut tawh a. DC, Aizawl hian sanction dilin DM&R Department lamah a thehlut ve tawh bawk a ni.