Mamit DC leh SP in ramri-a harsatna thleng an tlawh

Zirtawpni tlai khan Mamit District Thinghlun khua-a John Zolawma Thlam chu Assam Police leh Assam Forest Department ten an hal nia hriat niin Ben David-a Kuhva huan pawh Assam lam miten an tihchhiatsak nia sawi a ni a. Hemi chungchanga thil thleng leh boruak zirchiang turin Mamit DC, Dr. Lalrozama leh SP Shashank Jaiswal te chuan inrinni khan Thinghlun khua hi an tlawh a ni.

Mamit District Bawrhsap chuan ramri buai chu State sawrkar pahnihin dawhkan kila sawiho-a chinfel theih anih laia hetianga Karimganj Administration hotu ten anmahni ngaihdan chauh ngaihtuaha Mizoram leh Assam inrina Thinghlun khua-a Thlam halsak leh kuhva huan tihchhiatsak an ni chu pawi a tih thu leh a tawrhpui thu a sawi a. Dan lo anga Mizoram chhunga thil thleng chungchangah hian a tul anga hma la turin Karimganj Deputy Commissioner hnenah Zirtawp tlai khan ziaka thlen nghal a nih thu a sawi bawk. 

Mamit SP Shashank Jaiswal pawhin Thinghlun leh a chhehvel mipuite thlamuang taka awm tura chahin, a tul dan anga chak taka hmalak a nih dawn thu a sawi a. Mahni thu-a dan lo kengkawh ve ngawt lo tura mipuite chahin, eng thil pawh thleng se, Police leh IR Duty-te hnenah report pe zel thin turin a chah a ni.

Assam Forest hotute'n Mizoram chhunga signboard an rawn tar chu lakthlak niin Kanhmun Police Station-ah lak a ni a. Kanhmun OC hnenah FIR thehluh nghal niin Thlam an halna bulah hian 4th IR Platoon khat-te duty-na tur hnatlangin puan In sak nghal a ni.