COVID-19 No Tolerance Fortnight hman tur pualin Chief Minister in mipuite hnenah thuchah a sawi

Chief Minister, Zoramthanga chuan, “Kan duh ber chu ‘Zoram mipuite hripui leng lakah him ila, he natna hi inkaidarh zel lo ila, thihpui awm lo bawk ila’ tih hi a ni,” a ti.

Vawiin atanga ‘COVID-19 No Tolerance Fortnight’ hman tur puala thuchah a sawi ah Chief Minister, Zoramthanga chuan COVID-19 in Mizoram pawh thla 7 vel zet chu min chenchilh ta tih sawiin, Oct. 24 thlengin hri kai hmuhchhuah pawh 2500 an tling dawn hnai tih a sawi a. Tunhnaia Mizoram-a hri kai hmuhchhuah thar te chu natna langchhuak (symptomatic) an ni ta deuh zel tih sawiin, “Rin aiin COVID damlo te hian an la na in anmahni enkawltu damdawi lam mithiamte ngaihtuahna pawh a kal thui sawt ta hlein a hautak tan ta khawp mai,” a ti. ZMC-ah ICU khum 17 vel kan neih thu sawiin, tunah hian mi 4 te chu ICU-ah enkawl mek an nih thu leh Ventilator hmang pakhat an awm thu a sawi a, Isolation Ward hrang hranga mi 50 awm zingah Symptom la nei mi 21 an awm thu a sawi bawk a. Tuna COVID hri kai kan neih mek zinga zaa 90 chu State chhung mi leh sa kan ni chho ta tih Chief Minister chuan a sawi bawk.

Mizoram-a COVID-19 dinhmun tlema a serious chho ta deuh nia a lan avang hian sawrkar hotute leh tlawmngai pawl te leh Kohhran hruaitute inrawnkhawm chuan Prime Minister in ‘Jan Andolan’ a puan thlawp chungin COVID-19 hripui kan inkaichhawn lohna turin Vawiin, October ni 26 atanga November ni 9 thleng, kar hnih chhung ‘COVID-19 No Tolerance Fortnight’ hman an rel tih sawiin Chief Minister chuan, “Hei hi kan tana tha leh himna tur a ni tih hriain mitin in tha takin, theihtawpa thlawp hi kan tih makmawh a ni,” a ti.

Chief Minister chuan khawvel leh India ram dinhmun enin he hripui leng hian min kiansan mai rih dawna a lan loh thu sawiin, a invenna damdawi (vaccine) kan hmuh theih hun tur lah hriatchian theih ala ni rihlo tih a sawi a, chuvangin hripui nena lengza si a kailoh kha kan tum a tul thu a sawi a, “Kan duh ber chu ‘Zoram mipuite hripui leng lakah him ila, he natna hi inkaidarh zel lo ila, thihpui awm lo bawk ila’ tih hi a ni a. Sawrkar in dan eng ang pawhin han siam sela, a zawmtu tura beisei ten kan lak thutak tlat loh chuan awmzia a nei thui kher lovang” a ti a. COVID-19 dona kawnga thawktu hrang hrangte chungah lawmthu sawi bawkin Chief Minister chuan, thawhhona tha tak avanga tun dinhmuna harsatna lian tawklo kan nih thu leh he natna hi kan ram atanga kan umbo rak thlenga tang tlang zel turin a sawm nghal bawk.