International Girl Child Day, 2020 lawmna leh BBBP Photography Competition lawmman semna neih a ni

International Girl Child Day, 2020 lawmna leh Beti Bachao Beti Padhao (BBBP) Serchhip District Photography Competition lawmman semna chu nimin khan Serchhip-ah neih niin Serchhip District Addl. DC, Lalmuansanga Ralte chuan a hmanpui a ni.

Serchhip DC’s Conference Hall-a International Girl Child Day, 2020 lawmna leh Beti Bachao Beti Padhao (BBBP) Serchhip District Photography Competition lawmman semna hunah hian Addl. DC, Lalmuansanga Ralte chuan fanute chu fapa te ang bawka kan enkawla, an damchhunga dinhmun tha leh ngialnghet an rah ngei theihna atana kan tanpui a tul thu a sawi a, “India ram anga kan dinhmun thlir chuan nasa taka tanlak a la tul thei ang a; Mizoram anga thlir erawh chuan kan dinhmun a chhe lutuk lova ngaih theih a ni bawk ang,” a ti a. “Kan fanute aiin kan fapate zawk an ngaihtuahawm lek lek fo niin a lang a ni,” a ti.

Hei bakah hian Addl. DC chuan BBBP hmalakna atana Serchhip District thlan a ni chu lawmawm a tih thu pawh sawiin, Serchhip District chu hmeichhiate dinhmun duhawm taka an dinna District, India rama District dangte tan pawha entawn tlaka chhuah tum zel a duhawm thu a sawi a. BBBP Thlalak Intihsiaka lawmman dawngtute a lawmpui thu sawiin, thlalak chu ri tel lova thil tam tak min zirtir thei thil, ziak leh chhiar thiamlo tan pawha thu tam tak dawn theihna, midangte zirtir nana hmanraw tha chungchuang a nih thusawiin, nasa taka bei chhunzawm zel turin a sawm bawk a ni.

Nimin-a he hun hman hi Photography Competition-a Convener, K. Saitluanga MIS chuan kaihruaiin Mahila Shakti Kendra-a Women Welfare Officer, V. Lalruatsangi chuan BBBP hnuaia hmalakna hrang hrang te sawifiahna a nei bawk a ni.

Nimin-a lawmman sem tak Photography Competition-ah hian Category 2-ah inelna neih a ni a, DSLR Category-ah Mathew Lalruatkima, Serchhip Bazar chuan lawmman pakhatna lain Mobile Phone Category-ah Sailoliana E. Lungdar chuan lawmman pakhatna a dawng bawk a. Lawmman hi pakhatna atanga pthumna ve ve siam a nih bakah a titha dang mi 5 ve ve te hnenah Consolation Prize hlan an ni bawk.

Comments

Chhiar Hlawhte