Nikum aiin kumin ah thubuai ziahluh a tlem zawk

Kumin (2020)-a thla 8 kalta chhunga Mizoram Police te thubuai ziahluh chu nikum thla 8 chhunga thubuai ziahluh aiin 198 in a tlem zawk.

Mizoram Police te chhinchhiah danin kumin January thla atanga August thla thleng khan Mizoram pumah Police te thubuai ziahluh zat chu 1,517 a ni a, nikum (2019) January atanga August thla chhunga thubuai ziahluh aiin case 198 in a tlem zawk a ni. Thubuai ziahluh zingah a tam ber chu rukruk thubuai a ni a, kumin thla 8 chhungin thubuai 431 ziahluh a ni a, mi In rawk 263 a awm a, tualthah thubuai 21 ziahluh a ni tawh a, hei hi nikum thla 8 chhung aiin 9 in a tam zawk a ni. Hemi hun chhung tho hian nikum khan pawngsual thubuai 29 a awm a, kumin-ah 21 a awm tawh bawk.

Hei bakah hian State chhunga dan siam, Local and Special Law hnuaiah Zu khuahkhirhna dan MLPC Act bawhchhia an tam ber a, thubuai 201 ziahluh a ni a, nikum-ah 131 ziahluh a ni. Damdawi kaihhnawih thubuai, ND&PS Act hnuaiah nikum khan thubuai 121 a awm laiin, kumin ah 85 ziahluh a ni thung a. Hei bakah hian naupang kumtlinglo khuaikhem kaihhnawihah thubuai 66 ziahluh a ni tawh a, nikum aiin 11 in a tam zawk a ni. Kumin a thubuai liantham ziahluh a tlem chhan hi hrileng avanga mipui inkhuahkhirhna kalpui vang nia ngaih a ni.