Assam Rifles ten Mau phun beihpui an thlak

Aizawl-a awm Assam Rifles te chuan Mahatma Gandhi pian-champhaphak pualin nimin khan Aizawl-a Sipai Lammual-ah Mau phun beihpui ‘Bamboo Plantation Drive’ an buatsaih a, he hun hi Home Minister Lalchamliana chuan a hmanpui a ni.

‘Bamboo Plantation Drive’ puala hun hman ah hian Home Minister, Lalchamliana chuan Mahatma Gandhi pianchamphaphak puala Mau phun beihpui ‘Bamboo Plantation Drive’ Assam Rifles ten an buatsaih chu lawmawm a tih thu leh hlawhtling taka an kalpui ngei a beisei thu a sawi a, Mizoram Sawrkar pawhin ram hmasawnna turin Mau lamah nasa takin tan a la mek tih a sawi bawk.

Home Minister chuan Mizoram Sawrkar hmalakna sawiin, SEDP leh NBM kaikawpa Bamboo Development Programme hnuaiah tun dinhmunah Beneficiary 214 an awm mek thu leh Tissue Culture hmanga tihpun Mau phun tur 81,000 semchhuah a ni tawh tih a sawi a. Mizoram Sawrkar hmalakna pui ber SEDP hnuaiah Mau lama hmalakna atan kum 2019-2020 chhung khan cheng nuai 131 dah a ni a, sawrkar laipui NBM kaltlangin cheng nuai 350 dawn niin NEC hnuaiah cheng nuai 1300 sanction order nghah mek a ni, a ti bawk.