October ni 16, 2020 atangin Class X leh XII zirlaiten dan pangngaiin School an kal tan dawn

School Education Minister, Lalchhandama Ralte hova sawrkar mi pawimawh leh zirna kaihhnawih pawl hrang hrang thukhawm chuan Class-X leh Class-XII zirlai naupangte chu Board Exam hmachhawn tur an nih avangin October ni 16, 2020 atangin nitin School kal dan pangngai (regular)-in School kal ni tawh se an ti.

Secretariat Conference Hall-a nimin a thutkhawm neih ah hian School Education Minister, Lalchhandama Ralte chuan COVID-19 hripui leng avangin thla ruk (6) leh a chanve vel School regular-a kal a nih tawh loh thu a sawi a, hetih chhung hian School Education Department chuan zirlaite an awm awl loh nan an tih tur thil tam tak (activity) a lo buatsaih tawh tih a sawi a. Academic Year kal zelah kumkhat hloh a, kuangkuaha awm ringawt theih a nilo tih sawiin, Ministry of Home Affairs in order a lo chhuah angin, October ni 15 hnu lam hi chu State sawrkar ten COVID-19 boruak leh dinhmun thlir chunga ruahmanna siam a phal angin leh March 2021-a Academic Year tawp hun thlirin zirna In kalpui zel dan tur ngaihtuah tur hian he thutkhawm hi koh a nih thu a sawi bawk.

He thutkhawm a tel te hian Class-X leh Class-XII zirlai naupangte chu Board Exam hmachhawn tur an nih avangin, October ni 16, 2020 atangin nitin School kal dan pangngai (regular)-in School kal ni tawh se an ti a. COVID-19 hri laka an him theih nan Directorate of School Education in inkaihhruaina (draft SOP) a siam enho a ni a, siam danglam ngaite siam that niin, inkaihhruaina (SOP) tihchhuah a ni ang.

Hostel-a awm tur zirlai Class IX-XII inkar te chuan Rapid Antigen Test (RAgT) an paltang tur a ni a, negative result nei chauhte Hostel luh phalsak an ni ang. Hostel neitute leh enkawltu ten ruahmanna felfai tak an siam tur a nih bakah Directorate of School Education ruahmanna angin leh a tul danin Health Department te nena tangkawpin Hostel a him leh him loh te enfiah a ni bawk ang.

Class IX leh Class XI zirlaite chu tuna ruahmanna kalpui mek, an zirtirtute rawn tura School an kal chu chhunzawm ni se tih chu pawm a ni bawk a. Primary, Middle School bakah Class IX leh Class XI zirlaite kal zel dan tur chu November thla chanve hma-in ram chhunga COVID-19 boruak thlir chungin rel leh tur a ni ang.

Comments

Chhiar Hlawhte