Serchhip-ah hri kai pakhat hmuh belh a ni; Hri leng dona a thawk hri kai enkawl dam a ni

Niminpiah khan Serchhip-ah COVID-19 hri kai mi pakhat hmuh thar leh niin Serchhip District-a hri kai hmuhchhuah chu mi 63 an tling ta a. Serchhip District chhunga hri leng dona a thawktu hri kai hmuhchhuah pawh enkawl dam a ni tawh bawk.

Serchhip CMO Office atanga thu kan dawn danin niminpiah khan Serchhip District-a TrueNat Laboratory-ah Sample 20 enfiah leh niin heng atang hian COVID-19 hri kai mi pakhat hmuhchhuah a ni a, he hri kai hmuhchhuah hi mipa kum 33 mi niin Uttar Pradesh atanga lo kal, National Highway-54 siam hna thawktu Chhingchhip-a awm mek Prem Kram Infracon Pvt. Ltd. in an chhawr lai a ni a, Sept. 30 khan Serchhip District rawn thlengin Sainik School-a inkhunghrang nghal niin nimin a Sample enfiah a nih hnuah hri a kai tih hmuhchhuah niin Chhiahtlang CCC-ah enkawl tura dahluh nghal a ni.

Nimin vek khan Serchhip District-ah Rapid Antigen Test hmangin sample 37 enfiah niin hri kai hmuhchhuah thar erawh an awmlo thung.

Serchhip District-a hri kai hmuhchhuah pakhat chu nimin khan enkawl dam a nih hnuah Chhiahtlang CCC atanga chhuahtir a ni ve leh thung a, hri kai enkawl dam hi hmeichhia niin COVID-19 hri leng dona atana thawk tura inpe leh Sept. 26-a hri a kai tih hmuhchhuah kha a ni a, a sample enfiah a nih hnuah hri lakah fihlimin Vawiin khan chhuahtir a ni ta a ni.

Heti hian nimin thleng khan Serchhip District-ah COVID-19 hri kai hmuhchhuah chu mi 63 an tling ta a, an zinga mi 47 te chu enkawl dam ni tawhin tunah hian hri kai enkawllai mi 16 an awm mek a, Serchhip District-a hri kai hmuhchhuah atang hian zaa 74.60 te chu enkawl dam an ni tawh a ni. Serchhip District pawnlam atanga hri kai enkawl tur rawn dah te nen Serchhip District-a hri kai enkawllai chu mi 29 an ni mek thung a, an zinga mi 24 te chu BSF Sipai niin Nursing School CCC-ah enkawl mek an ni a, Chhiahtlang CCC-ah mi 4 leh Thenzawl AYUSH Hospital CCC-ah mi pakhat enkawl mek an la ni bawk.

Serchhip District-ah hian hri leng avanga inkhunghrang mi 180 an la awm mek a, an zinga mi 173 te chu sawrkar hmunhma hmun 8-a inkhunghrang niin midang 7 te chu mahni In lama inkhunghrang mek an ni thung.