Mizoram-a Zu khapna Dan hman hnua Sap Zu man khawm tihral a ni

Mizoram-a Zu khapna dan, Mizoram Liquor Prohibition Act 2019 hman hnua dan kalha Mizoram-a Sap Zu phurhluh Excise & Narcotics Department in an man te chu nimin khan Excise & Narcotics changtu Minister, Dr. K. Beichhua hovin leihbua-a tihchhiat a ni.

Bethany Multipurpose Farm, Phunchawng-a heng Sap Zu mankhawm tihchhiatna hunah hian Excise Minister, Dr. K. Beichhua chuan Zu leh ruihhlo in thalai nun a suat nasat dan leh khawtlang nun a tihchhiat dan te sawiin, Zu leh ruihhlo dona kawngah Zoram mipuite kan tan tlan loh chuan khawtlang a him dawn lova, Zu leh ruihhlo-in Intin a luhchilh ngam tawh a, a te ber atanga a lian ber thlengin a lut ngam a, chuvangin kiltin atanga do hi kan zavaia mawhphurhna a ni, a ti. Excise & Narcotics Department chu Force tlem te nei Department ni mahse an hmalakna te chu a fakawmin chhuanawm a tih thu Minister chuan sawiin, Zu dona kawngah sawisel leh diriam te tawk thin mahse, hei hi thalai nun tam tak chhanchhuahna anih avangin Department chuan chak lehzualin Zoram hmelma Zu chu an do zel dawn a ni, a ti bawk.

Nimin-a Sap Zu (IMFL) leihbuak hi Whiskey (Brand hrang hrang) Um puitling (750 ml) 2334 leh Um chanve 1143; Rum Um puitling (750 ml) Um 2523 leh Um chanve 84 leh Beer Um 56 leh can 243 te a ni a. Tualchhung hralhna a chhutin Rs. 56,56,400/- hu nia chhut a ni. Heng Zu te hi Zu khapna dan hman hnua Department-in an man khawmte a ni.

Heng Zu leihbuak-a tihchhiatna hun hi Deputy Commissioner of Excise & Narcotics, Z. Lalhmangaiha chuan kaihruaiin AH Vety, Fisheries and Sericulture Board Vice Chairman, C. Lalmuanpuia MLA leh Social Rehabilitation Board Vice Chairman, K. Liantlinga te pawhin he hun hi hmanpuiin thu an sawi a, Asst. Commissioner of Excise & Narcotics, Vanlal-rengliana chuan heng Zu an man chungchang hi sawifiahin, hun hman zawh a nih hnuah heng Zu mankhawm sa te hi leihbua in tihchhiat zui a ni.