MYC Coaching Centre leh Youth Centre sakna tur lung phum

Deputy Chief Minister, Tawnluia chuan nimin khan Mizoram Youth Commission (MYC) Coaching Centre leh Youth Centre sakna tur lungphum chu Aizawl Khatla-a MINECO-ah a phum.

He lungphum phumna hunah hian Deputy Chief Minister chuan khawvel thang chak takah Mizoram in thalaite Thluak a mamawh tih sawiin, ram in a hman tangkai theih tura nasa taka tuaihriampui a pawimawh thu a sawi a. Tuna Building sak tur lungphum phum a ni ta chu lawmawm a tih thu sawiin, “Sawkar chuan thalaite a ngaihvenzia ti langin a tih tur a ti a, a tihhlawhtling tura chona ropui tak hi thalaiten an chhanlet a tul a ni,” a ti bawk.

He hunah hian Mizoram Youth Commission (MYC) Chairman, Dr.Vanlaltanpuia MLA pawhin thalai zawng zawng ten ‘Kan Office’ an tih theih tur building pahnih sa tura lungphum phum a ni ta chu lawmawm a tih thu leh India ram pum inelna sanga Mizo thalai tam zawk an lan theihna tura thil tangkai a nih a beisei thu a sawi a. Delhi-a Coaching kal turin Mizo thalai lehkhathiam beiseiawm zual thlanchhuah 20 rual vel thawn tum a nih thu leh COVID avanga ramdanga hnathawk hna chan ta te tuamhlawm dan tur ruahman a nih thu bakah Online Job Portal siam mek a nih thu te pawh a sawi bawk.

MYC Secretary, Donny Lalruatsanga tarlan danin MYC Coaching Centre sak nan hian cheng vbc. 3 leh Youth Center sak nan cheng vbc. 5 ruahman a ni a, kum thum chhunga sak zawh hman tura duan a ni. Coaching Centre hi chhawng thum (3)-a sak tur niin Coaching Room te, Computer Room te, Cafeteria, Conference Hall, Office leh Quarters te a awm dawn a. Youth Centre-ah hian Career Guidance/Knowledge Centre, Gym Room, Guest Room, Indoor Hall, Meeting Room, Officer leh Art & Craft Room te a awm dawn a ni.