Mizoram-ah Mihring aiin mobile connection tam

Mizoram-a mihring cheng aiin Mizoram-a Company hrang hrangten Mobile Phone Connection an neih zat chu a tam zawk. Economics & Statistics Department-in tunhnaia an tihchhuah ‘Statistical Abstract of Mizoram 2019’-in a tarlan danin Mizoram pumah Mobile Phone Connection nei 11,35,632 an awm a. Kum 2011 chhiarpuia Mizoram mihring awm zat chu mipa 5,55,339 leh hmeichhia 5,41,867 niin mihring awm zawng zawng hi 10,97,206 an ni a. Kum 2011 chhiarpui lai aia kum 2019-a Mobile Phone Connection tamna zat hi 38,426 a ni.

 Mizoram-a Mobile Phone Service Provider zingah Airtel chuan hmangtu (subscriber) ngah berin Connection nei 4,57,566 an awm a, hei hi Mizoram-a Mobile Phone Connection atanga chhutin 40.29% a tling pha hial a ni. Jio chu pahnihna niin subscriber 3,12,143 an nei a, Mizorama phone connection atanga chhutin 27.48% a ni a, BSNL chu pathumna niin subscriber 2,05,835 an nei a, hei hi Mobile Phone Connection awm atanga chhutin 18.12% a tling bawk a, connection 1,60,088 neitu Vodafone chu palina niin an connection neih zat hi a pumpui atanga chhutin 14.09% a ni. Hetihlai hian kum danga Mobile Phone Connection pechhuak thin Aircel leh Idea chu an company tihtawp a nih avangin connection pek an nei tawh lo a ni.
    Mizoram District 8 zingah Aizawl District-ah Mobile Phone connection tam berin connection 538,880 a awm a, hei hi Mizoram-a Mobile Phone connection awm atanga chhutin 47.45% a tling a. Mamit District chu Mobile Phone Connection nei tlemna ber a niin connection 60,359 a awm a, hei hi Mobile Phone Connection awm atanga chhutin 5.31% a ni bawk.

Comments

Chhiar Hlawhte