Mizoram-a Hockey Field thar 2 siamna tur sum hmu

Sports Minister, Robert Romawia Royte chuan Mizoram-a Hockey Field thar pahnih siamna atan sawrkar laipui atangin cheng nuai 1600 hmuh a nih thu a sawi.

Hockey Mizoram Website thar hawnna nimin-a a Pisa-a neih ah he thu hi sawiin Sports Minister, Robert Romawia Royte chuan khawvel hriata Mizote min pho-langtu pawimawh tak chu Hockey a nih thu leh Hockey mellung pawimawh tak ‘Hockey Mizo-ram Website’ hmanga phun a ni chu lawmawm a tih thu a sawi a. Chief Minister Zoramthanga kaihhruai sawrkar in thalaite tan hmathlir thui tak neiin kawng hrang hrangah hma a la chho mek tih sawiin Sports Minister chuan, tunah hian Aizawl District Muallungthu-ah leh Lungei-ah Hockey Field Phullem phah turin Central sawr-karin sum cheng nuai 1600 a sanction tih a sawi a, Hockey hmanga infiamna hi chawilara tihvul zel an tum thu leh Sport Policy leh Sport Industry dinhmuna hlankai hlawkna kan tel mek thu a sawi bawk.

Hockey India chuan kum 2019 atang tawh khan a hnuaia Affiliated Unit Member te chu Website nei vek turin ti mah se, Hockey Mizoram chuan sum harsatna avangin a tihlawhtling thei lova. Harsatna tam tak paltlangin tunah hian Hockey player te hmakhua thlirin Hockey India in ti tura a tih angin website hi an siam a, Lailen Consultancy Pvt. Ltd, Tuikhuahtlang nen MoU ziakin Website thar - http//hockeymizoram.org chu Hockey India leh Hockey infiamna ngaisang leh tui mite hman theih turin siam a lo ni ta a ni.

Hockey India hnuaiah hian Affiliated Member chi hrang pali (4) an awm a, Permanent member 29, Associated member 28, Academic member 33 leh Hockey member 2 an awm a, Hockey Mizoram chu Permanent member 29 zinga pakhat a ni.