Ramri buaina nghawng theih Bawrhsap hovin sawiho

Inrinni zan-a Assam leh Mizoram ramri-a buaina thleng chungchang leh chumi in Serchhip District chhunga nghawng a neih theih te ngaihtuahin nimin khan Serchhip-ah District Bawrhsap, Kumar Abhishek hovin sawrkar mi pawimawh te an thukhawm.

He thutkhawm Serchhip DC Meeting Hall-a neih ah hian Bawrhsap chuan, Mizo mipuite rilru natna a hriatthiam pui thu leh hun rei tak ata harsatna an lo tawh tawh dante a hriatthiam pui thu sawiin, buaina chin fel nana buaina bawk chawhchhuah erawh a fuh ber loh theih thu a sawi a, Ram-in Dan a nei a, dan ang taka chinfel tuma hmalak a that a rin thu a sawi bawk.

Bawrhsap chuan tunah hian kan District chhungah Non-Mizo tam tak hna hrang hrang thawkin an awm mek tih sawiin, chutiang bawkin Mizote pawh Assam State-ah engemawzat an awm bawk a. He buaina chungchang engmah hre lem lo, mawhphurhna engmah nei ve hauhlo te pawh an ni thei tih sawiin, chung miten he buaina nghawng thalo an tawrh loh nan theihtawp chhuah tlang tura sawmin, harsatna a awm chuan District Administration in chak taka a umzui zel tur thu a sawi a. Thuthang diklo, mipuite tichiai thei thehdarhlo tura fimkhur turin mipuite a chah bawk a, Media mite pawh hetiang kawnga kan him theih nana thawhpuiah a sawm bawk.

He hunah hian Addl. SP, PC. Laltanpuia pawhin ramri boruak leh a nghawng thil thalo awm palh thei te ven kawngah tlawmngai pawl hrang hrang te thawhpuina a ngen bawk.

He hunah hian Serchhip NGOs Co-ordination Committee aiawhte leh NGO hrang hrang aiawhte pawhin thu sawiin, boruak muanawm tak hnuaia engkim kalpui tha an tih thu an sawi rualin, Pathian in min pek an chenna ram venghim tur chuan engkim an huam thu an sawi a. MZP leh MSU te chuan General Hqrs. thuchhuah anga Non-Mizo chu thu leh awm hma chu an sahimna atana pawnchhuah an khap thu an sawi bawk.