Chanchin thar thenkhat :

 Tualthattu chungthu ngaihtuahna nei leh dawn

Aizawl Republic Veng Joint Action Committee chuan January 9, 2015-a an Veng-a Sangliansiama te chhungkua mi panga thattu Laltlanchhuaha tan Vawiin, Oct. 29, 2020 hian Final Hearing a ni dawn tih sawiin, an rilru a na thar hle tih thuchhuah siamin an tarlang a. Laltlan-chhuaha hi Republic Veng khua leh tui a nihna hlihsak a ni tawh tih sawiin, a thiin emaw, a nung chungin emaw Republic Veng chhungah lakluh an remtih loh thu leh Tualthahna rapthlak tak chungchangah dik taka rorel a nih theih nana dâltu an awm a nih chuan a tul angin hma an la zel ang tih an sawi bawk.

Bank hmalakna thlirho a ni

Nimin khan Lawngtlai-ah District Consultative Committee, District Level Review Committee leh District Level Security Committee thutkhawm neiin kumin January thla atanga June thla thlenga an District chhunga Bank hrang hrangte hmalak dan thlirho a ni a, he thutkhawm ah hian mi harsa zawkte leh kut hnathawktute hnena a tam thei ang ber sum puktir (loan pek) a, chumi hmanga an dinhmun chawikan chu District Consultative Committee-in a tum ber a nih thu tarlan niin, Agriculture kaihhnawih loan pekchhuah a tam zawk theih nan Line Department leh Bank lam ten tan la se an ti a. COVID-19 laka himna tura inkaihhruaina bawhchhe si lova Financial Literacy Camp (FLC) a tam thei ang ber neih te pawh rel a ni bawk.

LADC inthlan atan inbuatsaih

Lai Autonomous District Council (LADC)-a Member of District Council (MDC) thlanna nei turin inbuatsaihna kalpui mek a ni a, nimin khan inthlanna neih tura mawhphurhna hrang hrangte hlenchhuah a nih theihna tura Nodal Officer atana ruat te tan an hnathawh dan tur chungchanga sawihona pawh neih a ni bawk. LADC-a MDC inthlanna neih hun tur hi puan la ni lo mah se Governor chuan inthlan buatsaih phalna chu State Election Commission-ah a pe tawh a, he inthlanna a hman tur Electoral Roll enfiah hna chu tun thla ni 19 khan tanin tun thla ni 29 khian Final Electoral Roll tarchhuah a ni dawn a ni.

MZP in sawrkar an ngen

MZP General Hqrs. chuan nimin khan thu-chhuah siamin tunlaia ramri avanga buaina awm mêk kaihhnawih a Assam atanga Mizoram-a lirthei lo lut tur dang zawnga nimin-a Lailapur, Medili leh Garmura lama hmalakna awm chu an ngai thu takin thinurthlak an ti hle tih an sawi a. Kawng dangtute hi anmahni leh anmahni an in tihbuai nghak chhuak zawk turin Mizoram sawr-kar thuneitute chu an ngen nghal bawk.

Zirlai tithate chawimawi

MZP Sub-Hqrs. East Lungdar chuan niminpiah khan MZP dincham lawmin zirlai tithate chawimawina hun an hmang. MZP dinchampha vawi 85-na lawmna leh zirlai titha chawimawina hun MZP Sub-Hqrs. East Lungdar in SSA BRC Conference Hall-a an buatsaih ah hian kumin a an huamchhunga HSLC, HSSLC leh BA-a 1st Division-a pass chin mi 26 te hnenah chawi-mawina hlan an ni a, he hun hi hri leng avanga inkaihhruaina zawm chunga hman niin PHE East Lungdar Sub-Division a SDO, PB. Lalnunsanga leh East Lungdar VCP, K. Lal-ngaizuala te chuan an hmanpui a ni.