Chief Minister hovin PHE Department hotu ten Mizoram-a Jal Jeevan Mission kalpui dan an thlirho

Mizoram-a Public Health Engineering (PHE) Department hotute chuan nimin khan Chief Minister, Zoramthanga hovin Mizoram-a Jal Jeevan Mission (JJM) kalpui mek chungchang sawihona neiin PHE Department changtu Deputy Chief Minister, Tawnluia pawhin he hun hi a hmanpui a ni.

Chief Minister Office Cabinet Meeting Room-a thutkhawm ah hian kum 2019-2020 chhunga hmalak tawhna thlirhovin, kumin kum kal mek 2020-2021 chhunga hmalakna te sawiho a ni bawk a. Jal Jeevan Mission hi India rama thingtlang khuaa chenna In tin-a Tui Connection siam sak a, tui thianghlim 55 litre per capita per day (lpcd) tal pek thin an nih theihna tura sawrkar laipui hmalakna a ni a. Nikum (2019-2020) chhung khan Mizoram chu he hmalakna hnuaiah hian State thawk tha pawl niin, sawrkar laipui atang pawhin lawmman (incentive) pek a ni a; khami kum chhunga hmalakna tur sum bithliah sak aia tam a dawn phah a. Kumin hian state hrang hrangte hripui leng avangte in hma an lak that theihloh thu leh, Mizoram-ah ngei pawh duh anga chet lak a theihloh thu he hunah hian sawilan a ni.

Mizoram chhungah JJM kalpuina tur khua leh khawhbawk awm zat belhkhawm chu 722 a ni a, heng zingah hian tun dinhmunah khua 78 chu chenna In tin Tui Connection thlun sak tawh a ni a. Nimin-a thutkhawmah hian tun dinhmunah Tui Connection siam hi tui lakna awlsam chin a la nih thu tarlan a ni a. Kum lo awm leh turah chuan tui lakna harsa deuh zawkte a la awm dawn avangin chung atan chuan hmalakna thar siam tel a ngaih tur thu PHED Engineer te chuan an sawi a. Hemi chungchangah hian ruahtui khawl (rainwater harvesting) lama nasa zawka hmalak pawimawh an tih thu Chief Minister leh Deputy Chief Minister chuan an sawi a ni.

JJM hnuaiah hian hmalakna tur khua ah Village Water and Sanitation Committee (VWSC) din a ni hlawm a, Village Level-ah vek hmalakna tul awm ang te duan a ni a. District tinah Implementation Support Agency (ISA) siam bawkin, a vaiin ISA hi 12 a awm a, ISA hi Siaha District-ah MTP te hman niin Lawngtlai District-ah YLA leh YCA bakah District dang zawngah YMA te hman an ni a. Mizoram University-a Civil Engineering Department te chu Third Party Inspection Agency atana thawhpui niin, anni hian hmalakna te an enfiah sak bawk a ni.