Serchhip District-ah hri kai 308 enkawl dam tawh

Serchhip District pawnlam atanga COVID-19 hri kai hmuhchhuah, Serchhip District-a enkawl tura rawn dah mi 247 te chu enkawl dam vek niin anmahni enkawlna hmun atanga chhuahtir an ni tawh a, Serchhip District-a hri kai enkawl dam zawng zawng chu 308 an ni tawh.

Serchhip CMO Office atanga thu kan dawn danin Mizoram-a COVID-19 hri kai hmuhchhuah an tam chhoh hnu khan Aizawl District-a hri kai hmuhchhuah te chu enkawlna hmun a indaihloh deuh avangin hri kai hmuhchhuah zinga taksa-a natna lanchhuahna neilo mi thenkhat te chu Serchhip-ah enkawl tura rawn dah niin BSF Sipai hri kai te enkawlna tur hmun pawh Serchhip-ah hian siam a ni bawk a, heng District pawn lam atanga hri kai enkawl tura rawn dah tawh zawng zawng hi an vaiin mi 247 niin an vai hian enkawl dam an nih hnuah chhuahtir vek an ni tawh a ni. Heng hri kai enkawl dam te hi BSF Sipai mi 189 leh midang 58 niin BSF Sipai te hi Serchhip Nursing School CCC-a enkawl niin midang 58 te hi Thenzawl AYUSH Hospital CCC-a enkawl an ni thung.

District dang atanga hri kai enkawl tur rawn dah mi 247 te nen hian Serchhip District-a hri kai enkawl dam tawh zawng zawng chu mi 308 an ni tawh a, tunah hian hri kai enkawllai mi 4 an la awm mek a ni.