Chanchin thar thenkhat :

 FOCUS hmalakna tur thlir

Nimin khan Kolasib-ah FOCUS District Level Consultation Committee (DLCC) thutkhawm neiin FOCUS Innovation Fund hnuaia dilna 128 lutte chungchang leh kum 2021-22 chhunga MGNREGA nen tangkawpa hmalak dan tur sawiho a ni a. Meeting chuan Innovation Fund diltute chu Expert Committee kaltlang a zirchianna neih hnuah a tul anga thlitfim leh nise tiin a rel a ni. Innovation Fund hnuaia dilna lut tam ber chu Vawk vulhah a ni a, Kuhva huan siam tum leh Ar vulh a hmalak tumin an dawt a ni. Kum 2021-22 chhunga FOCUS leh MGNREGA tangkawp a hmalakna tumnaah hian Dragon Fruit chin, Kuhva, Kuhva rah Skoping, Sangha dil, Logwood bunding, Bench Terracing, Vawk In sak, Eri rearing, Muga rearing leh rubber plantation te a tel bawk a ni.


ST Girls Hostel hawng

Social Welfare Minister, Dr. K. Beichhua chuan nimin khan Govt. Mamit College-a Schedule Tribe Girls Hostel sak thar chu a hawng a, he Girls Hostel sak thar chu District pawn atanga zirlaite'n tangkai taka an hman a duhsak thu a sawi bawk. Govt. Mamit College-a Schedule Tribe Girls Hostel hi cheng nuai 186.93 senga sak niin Tribal Hostel Scheme neih atanga Social Welfare Department kaltlangin Project hi siam a ni a, March 2016 khan sak tan niin nikum June thla khan sak zawh a ni a, Building hi chhawng hnih niin khum 24 awm theihna Room 6 dah a ni a, Northeast Consultancy Services (NECS) ten an sak a ni.


Chenna In chhuahsan

Tunhnai ruahsur nasa vanga Khawzawl Vengthar lei tlahniam a chet leh avangin Khawzawl Vengthar Bazar Building thlang lam, Vengthar Field leh Vengthar YMA Hall inkar a awm chhungkaw 5 chu mahni In-ah awm ngam tawh lovin an In chhuahsanin an bungrua thiarchhuah a ni a, heng mite hi YMA Hall leh School-ah te chen lailawk tir an ni.


ZPM in mithar lawmlut

ZPM General Hqrs. chuan nimin khan an party zawm thar lawmluhna hun Aizawl-ah hmangin he hunah hian MP inthlanpui neih hnuhnung bera PRISM Party Candidate, TBC. Lalvenchhunga bakah PRISM Party-a Treasurer ni thin, Zodin-sanga leh General Secretary ni thin, Eddie Zosang-liana bakah Thingsai khua atangin Congress Party Block leh Unit hruaitu leh party mi, voters 40 an tel tih ZPM thuchhuah chuan a tarlang a. Heng ZPM zawm thar te hi ZPM Legislature Party Leader, Lalduhoma MLA chuan lawmlutin MLA atanga amah ban tura ngenna chu ZPM tan malsawmna a nih hlauh thung thu a sawi bawk.


Peer Volunteer training nei

Ruihhlo leh a kaihhnawih hrang hrang laka India ram a fihlim theihna tura Ministry of Social Justice & Empowerment leh Mizoram Social Defence & Rehabilitation Board-te tangkawp hmalakna 'Nasha Mukt Bharat Campaign' neih tura Peer Volunteer mi 50 te tana training chu nimin khan Kolasib-ah neih tan a ni a, he Campaign hi India rama District 272-ah kalpui tur niin Mizoram-ah chuan Aizawl, Kolasib leh Champhai-ah kalpui a ni dawn a, Volunteer te hian damdawi hmansualna laka fihlim turin Social Media kaltlangin khawtlang ah zirtirna an pe ve leh dawn a ni.

Comments

Chhiar Hlawhte