Hripui len hnuah mipui ten ei leh bar an tlakchham loh nan Sawrkar in hma a la zel

Mizoram sawrkar-a Food, Civil Supplies & Consumer Affairs Department chuan COVID-19 hrileng kara mipui ten ei leh bar an tlakchham lohna tura hma an lak thu sawiin, PMGKAY Scheme hnuaia buhfai a thlawna sem tur chu December, 2020 thleng sem a nih tur thu an sawi bawk.

Food, Civil Supplies & Consumer Affairs Department hian COVID-19 hripui leng kara mipui ten ei leh bar an tlakchham lohna tura an hmalakna te tarlangin, National Food Security Act (NFSA) Ration Card nei te leh Non-NFSA Ration Card nei, miharsa Task Force-in an thlanchhuah te hnenah LESD&E Department pawisa atangin April thla khan a thlawnin buhfai quintal 13,717.06 sem a ni tih an sawi a. Non-NFSA hnuaia miharsa Task Force-in an thlanchhuah te hnenah buhfai a thlawnin May thla khan quintal 10,682.78 chu an Department in a sem leh thu an sawi.

PMGKAY Scheme hnuaia NFSA Ration Card nei te hnena a thlawn a sem tur thla khat zelah 33,410.75 Quintals (mi pakhat tan thla khatah 5 Kg) Central Sawrkar atanga hmuh niin, hei hi April, 2020 atang khan sem tan a ni a November, 2020 thleng sem tura allocation hi hmuh a ni. Tunah hian August thla quota thleng buhfai hi pek tawh a ni. Central sawrkar atanga allocation thla khat atana Mizoram in a hmuh quintal 33,410.75 hian NFSA Ration Card nei te hnena 5 Kgs. zela pe tur hian thla tin quintal 1,182.05 zelin a daih lo a. Hei hi NFSA beneficiaries zat hi kum 2015 ami angin Central sawrkarin an rawn chhut vang leh, tun dinhmunah beneficiaries hi a hma aiin an tam tawh vang a ni. Hemi avang hian PMGKAY hnuaiah thla khat ah quintal 34,592.80 sem mek niin State Sawrkar in buhfai PMGKAY Scheme-a a chawi belh tawh zat chu quintal 5097.80 a ni.

PMGKAY Scheme hnuaia buhfai a thlawna sem tur hi April, 2020 - November, 2020 (thla riat) atan hmuh tawh a ni a, allocation hi hmuh tlai hret a nih vangin July thla a sem tur kha August-ah sem hman chauh a ni a, hei vang hian Free Ration hi December, 2020 thleng sem a ni ang a. PMGKAY bakah hian NFSA hnuaia normal allocation chu a pangngaia mipui hnena sem reng a ni bawk.

Heng bakah hian NFSA Ration Card nei te hnenah Dal quintal 1,554.05 chu chhung-kaw khat tan Kg. 1 zelin April, May leh June, 2020-ah sem niin Atma Nirbhan Bharat Aabhiyan Scheme hnuaiah Chana quintal 297.5 chu NFSA Ration Card nei te hnenah sem a ni bawk.