Chanchin thar thenkhat :

CM hovin sawihona nei

Nimin khan Chief Minister, Zoramthanga hovin a Pisa-ah National Infrastructure Pipeline (NIP) project chungchang sawihona chu Planning Department hotute nen neih a ni a, NIP hi India sawrkarin kum 2019 khan bultanin, hma-sawnna ruhrel liantham leh tluantling ram puma siam a nih theih nan kum nga chhunga thawh turin cheng nuai vbc.102 chu he hmalakna atan hian sanction a ni a. Energy, Roads, Railways leh Urban Infrastructure hi ngaih pawimawh zual niin, he hmalaknaah hian Central leh State ten 39% ve ve share neiin Private Sector in 22% an nei  bawk.

Agri. Minister in lawmpui

Agriculture Minister, C. Lalrinsanga chuan Indian Council of Agriculture Research (ICAR) hnuaia ‘Best Women Scientist Award 2020’ dawngtu Dr. Michelle C. Lallawmkimi (KVK Kolasib) leh ‘Young Scientist Award in Horticulture 2020’ dawngtu Dr. Malsawmkimi (KVK Khawzawl)te chu nimin khan a Pisa-ah an Award dawn lawmpuina hun hmangin chawimawina thuziak a hlan a, kumin Sept. 26-28 chhung khan 2nd National Conference of Society of Krishi Vigyan chu Webinar hmanga India ram pum huapa neih a ni a. He Conference-ah hian Mizo Scientist pahnihte hi heng Award hi hlan an ni.

Bank hmalak dan thlirho

State Level Bankers Committee (SLBC) Mizoram thutkhawm chu Vawiin khan Aizawl a Secretariat Conference Hall-ah neih a ni a, he huna tarlan a nih danin Mizoram-ah Bank 26 awm mekin Branch 210 a awm a, Public Sector Bank Branch 81, Private Sector Bank Branch 24, Regional Rural Bank Branch 86 leh Co-operative Bank Branch 19 te a ni. He hunah hian kum 2020-2021 Quarter hmasa bera Bank te hmalak dan thlirho niin CD Ratio chu 37.09% a ni a, he hun kaihruaitu Chief Secretary, Lal-nunmawia Chuaungo chuan CD Ratio chu State dangte aiin ala hniam hle tih sawiin, hei hi Bank ten loan an pekchhuah tlem vang a nih thu a sawi bawk.

FEMSE ten thilpek hlan

Federation of Mizoram Samagra (RMSA & SSA) Employees (FEMSE) chuan Mizoram in COVID-19 dona kawngah leh a tul anga hman atan ICU khum 5 (Rs. 2,53,700/- man) chu Health Minister, Dr. R. Lalthangliana hnenah nimin khan an hlan a, Zoram Medical College (ZMC)-a hman turin Refrigerator lian pakhat an hlan bawk.

Doctor dah vangin lawm

Tuipuiral Zirlai Pawl (TZP) chuan an huam-chhung khaw 25-a PHC-a thawktu indaihlohna chungchangah an theih ang tawkin hma an lo lak tawh thin thu sawiin, an ngenna ti hlawh-tlinga kum 34 liam ta, kum 1986-a din tawh Sesih PHC-a Doctor dah a ni ta chu lawmawm an ti hle tih thuchhuah siamin an tarlang.

Mizoram-ah hri kai enkawl dam an pung zel

Niminpiah-a Mizoram-a Sample enfiah atangin COVID-19 hri kai mi 2 hmuh leh niin heng mite hi State pawn atanga rawn lut ve ve an ni a, heng te nen hian Mizoram-a hri kai hmuh tawh chu 2150 an tling tawh a ni. Nimin khan Mizoram hmun hrang hrangah mi 7 te chu enkawl dam leh niin tun thlenga hri kai enkawl dam chu 1926 an tling tawh bawk a, hri kai hmuhchhuah atanga zaa 89.58 te chu enkawl dam ni tawhin tunah hian hri kai enkawllai 224 an la awm mek bawk a ni.