Mizoram-ah COVID-19 hri kai sang hnih an chuang ta

Mizoram-ah COVID-19 hri kai mi 31 hmuh belh leh niin hri kai hmuhchhuah zawng zawng pawh sang hnih an chuang ta.

Niminpiah khan ZMC Laboratory-ah Sample 364 enfiah niin heng atang hian COVID-19 hri kai 15 hmuhchhuah an ni a, ZMC Laboratory-a hri kai hmuhchhuah tharte hi Aizawl District-a sample lak vek, mipa 14 leh hmeichhia 1 an ni a, tunhnaia zinchhuahna nei, Mizoram pawn atanga rawn lut leh inkhunghranna hmuna awm vek an ni a, tualchhunga hri inkaidarh erawh an awmlo niin a lang. ZMC Laboratory atanga hri kai hmuhchhuah thar mi 15 zinga 13 te chu BSF Sipaite an ni.

Niminpiah vek khan District hrang hranga TrueNat Laboratory-ah Sample 59 enfiah niin heng atang hian hri kai mi 5 hmuh belh an ni bawk a, an vai hian Lawngtlai District-a hri kai hmuh te vek niin Jharkhand atanga lo kal, Border Roads Organisation (BRO) mi leh sa vek an ni a, inkhunghranna hmuna awm leh an taksa a natna lanchhuahna neilo te an ni. Rapid Antigen Test hmangin nimin khan Mizoram-ah Sample 829 enfiah a ni bawk a, heng atang hian hri kai 11 hmuh niin Kolasib District-ah hri kai 10 hmuh an ni a, Mipa 9 leh hmeichhia pakhat niin CIJW Vairengte-a mi 7 leh midang 3, CIJW Lailapur, Cachar District, Assam a mi te an ni a, hri kai hmuh pakhat hi Serchhip-a awm Assam Rifles mi niin Aizawl-a inentir tura kal niin hri a kai tih an lo hmuchhuak a ni.

Nimin khan hri kai mi 124 te chu enkawl dam leh niin nimin thleng khan Mizoram-a hri kai hmuhchhuah chu 2018 an tling ta a, mi 1721 te chu enkawl dam niin enkawllai 297 an la awm bawk.

India ramah COVID-19 hri kai nuai 63 an tling tawh :

India rama COVID-19 hri kai hmuhchhuah chu nuai 63 an chuang ta a, hri kai enkawl dam pawh nuai 52 an chuang tawh bawk. Ministry of Health & Family Welfare chhinchhiahna atanga a lan danin darkar 24 kalta chhung khan India ramah sample 14,23,052 zet enfiah leh niin heng atang hian COVID-19 hri kai mi 86,821 hmuh belh leh an ni a, heng te nen hian India rama Sample enfiah zawng zawng chu 7,56,19,781 tling tawhin hri kai hmuhchhuah zawng zawng pawh 63,12,584 an tling ta a, India rama Sample enfiah atanga zaa 8.34 te chuan hri hi an kai a ni.

India rama hri kai hmuhchhuah atang hian enkawl dam pawh pung ve zelin darkar 24 kalta chhung khan mi 85,376 te chu enkawl dam an ni a, tun thlenga hri kai enkawl dam chu 52,73,201 niin hri kai hmuhchhuah zawng zawng atanga zaa 83.53 te chu enkawl dam an ni tawh a ni. Darkar 24 kalta chhung khan India ramah hri kai nunna chan 1,181 zet an awm leh bawk a, heng te nen hian India rama hri kai nunna chan chu 98,678 tling tawh bawk a ni.

Comments

Chhiar Hlawhte