Covid laka himna Dan khauh lehzuala kenkawh tum

COVID-19 hri leng laka mipuite an him theih dan tur ngaihtuaha nimin-a District Bawrhsap hova sawrkar mi pawimawh te thukhawm chuan COVID-19 laka himna tura Dan te khauh lehzuala kenkawh nise an ti.

Serchhip District Bawrhsap, Kumar Abhishek hova a Pisa-a sawrkar mi pawimawh te thukhawm hian tunhnaiah Serchhip khawchhunga hri kai hmuhchhuah belh a nih zel avangin fimkhur leh chak zawka hmalak a ngai an ti a. Sawrkar thuchhuahin himna dan a lo sawi tawh angin pawna chhuak tur ten hmai tuamna (Mask) hman vek tur a ni a, hmai tuam lova khawlai chhuakte chu Police te leh VLTF duty ten dan anga man zel tur niin; pawisa chawi tir zel tur an ni dawn a ni. Midang tana harsatna thlentu ni lo tura hmaituamna hmang vek turin mitin an ngen a. Chhiatni thatni ah pawh mihring punkhawm theih zat danin a sawi chu khawng taka kalpui tur a ni. COVID-19 hri leng hi eng ang chiahin nge mipui ah a darh tih hriat nan a tul angin Random Test pawh la neih tur ani dawn bawk a ni.

He Meeting-ah hian Serchhip Addl. DC Lalmuansanga Ralte; Serchhip CMO Dr. Laldawngliana Sailo, Addl. SP PC. Laltanpuia, SDPO Kaste Romalsawma leh Vishal Sah IAS te an tel a ni.