Hripui laka zirlaite an him theih nana theihtawp chhuah turin zirlai nu leh pa te Minister in a chah

Health Minister, Dr. R. Lalthangliana chuan zirlai nu leh pa te chu an fa te hripui laka an him theih nan theihtawp chhuah turin a chah.

Inrinni-a mipuite hnena thuchah a sawi ah Health Minister, Dr. R. Lalthangliana chuan Mizoram dinhmun thlirin sawrkar thuneituten Zirna In hawn an rel thu leh zirlaite hmakhua ngaiin Board Exam hmachhawn tur pawl 10 leh 12 zirlaite chuan October ni 16 atanga Regular Class neiin pawl 9 leh 11 zirlaite chu an mamawh dan anga an zirtirtute rawn tura sikul an kal phalsak an ni tih a sawi a. Hemi chungchangah hian zirlai nu leh pa te chu an fa te hripui laka an him theih nan thawihtawp chhuah tura chahin, “Sikul kai tura In atanga an chhuah dawnin hmai tuamna (mask) vuah tir ngei ngei ila, a spare pakhat tal pai tir bawk ila, sikul-ah zirlai dangte nen inhnaih taka awm lo turin Social Distancing vawng tha ngei ngei turin i chah nawn mawlh mawlh ang u,” a ti a. Hei bakah hian In lamah an theih ang angin ei tur hrisel leh tha pek tuma zan rei tak tak men tir lo tu leh taksa insawizawi that tir turin a chah a, “Sikul-ah an thiante nen Note bu, Tiffin leh thildangte inhmantawm loh tur a ni tih kha hrilhfiah fo ila, midangte nen hetiang hmanrua chi hrang hrangte an in hmantawm loh nan anmahni intodelh tir vek i tum ang u,” a ti bawk.

Zirlaite pawh nu leh pa te bakah zirtirtute thu awih taka hripui laka inven dan tur an hrilh te fimkhur taka zawm tura chahin, a tul tawpkhawkah lo chuan mask phelh loh tur a ni tih Health Minister chuan a sawi a. “In thiante nen rei tak in inkawm tawh loh hnuah sikul-ah in han inhmukhawm dawn a nia, in inngai tlangin infiamhote pawh in chak viau ang tih ka ring, amaherawhc hu nangmahni mai bakah in chhungte leh in thiante nena in himna tur a ni tih hria in insum rih ula, Social Distancing in zawm tha hram hram dawn nia,” a ti a, Sikul-ah thiante nen Tiffin eiho loh tur a ni a, a khat tawka kut silfai/tihfai reng tur a nih thu leh Tui bottle te midang nen inhmantawm loh tur a ni tih a sawi bawk.

Hei bakah hian Health Minister chuan zirlai naupangte chu Note bu, Pen, Pencil leh thil dang te midang nen inhmantawm lo tura chahin, “Sikul atanga in haw pawhin khawiah mah peng kawi lo ula, In in thlen veleh uluk takin intifai nghal thin ang che u. Sikul-ah leh khawlai-ah chil chhak loh tur a ni tih kha hre reng ula, zanah darkar 8 tal mut tum ula, nitin minute 45 vel tal taksa insawizawi in tum ang a, in fimkhur phawt chuan he hripui leng lakah hian in him bakah midangte zirtirtu in ni thei a ni tih in hre reng dawn nia,” tiin School neitu leh Zirtirtute pawh zirlaite chetla uluk taka vila Education Department-in Standard Operating Procedure a duan te uluk taka zawm hram hram turin a chah bawk.