Lenkawl

Nimin khan Serchhip District-a Ngentiang khua ah zirlai naupangte tan Protection of Children from Sexual Offences (POCSO) Act zirhona neih a ni.

United Pentecostal Church-North East India (UPC-NEI) a Hmeichhe pawl. Ladies Auxiliary Department (LAD) te chuan nizan atang khan Pastor Bial Inkhawmpui an nei mek a. Serchhip Bial LAD Inkhawmpui vawi 58-na chu Chanmari UPC Biak In-a neih niin thupui atan ‘Nang malsawmna ni ang che’ tih hmangin Speaker atan District Secretary Rev. H. Lalropuia hman a ni a. Serchhip Dinthar Bial UPC te pawhin LAD Inkhawmpui vawi 25-na hi Serchhip Dinthar UPC Biak In-ah neiin thupui atan ‘I Pathian tawk turin inpeih rawh’ tih hmangin Speaker atan District LAD President Sist. R. Lalramsiami chu hman a ni bawk.

Nimin khan Mizoram Presbyterian Kohhran buatsaihin Serchhip Kawnpui Kohhran Diamond Jubilee Hall-ah ‘Women's Ordination’ (Hmeichhe nemngheh) chungchanga inrawnkhawmna neih a ni.

Kumtin May 31-a hman thin ‘World No Tobacco Day’ chu kumin hian Pathianni a nih avangin nimin khan Mizoram-ah ‘Unmasking the appeal – countering nicotine and tobacco addiction’ tih thupui hmangin hman a ni a, Serchhip-ah pawh Govt. JM H/S-ah he ni pual hian hun hman a ni.

Kum kalta 2025-2026 chhung khan Mizoram-ah HIV kai thar mi 1732 hmuhchhuah an ni a, HIV inkaichhawnna langsar ber chu mipat hmeichhiatna hman atangin a ni.

Serchhip-a Bharti Gas hmangtute chu July 2026 chhunga an Cylinder Consumer Card te thehlut tura tih an ni.

Mizoram Journalist’s Association (MJA) Champhai District-a President nilai Lalhlupuia chu nimin khan boralin nimin vek khan vuiliam nghal a ni. Champha-a ni tin chhuak Chanchinbu ‘Lenrual’ Editor leh AIR Correspondent nilai Lalhlupuia hian nikum khan Pumpui hnun Cancer a nei tih hriatchhuah niin hun engemaw chen an enkawl hnuah nimin zing dar 7:30 khan Cham-phai-a DM Hospital-ah a boral a, nimin tlai dar 3:00 khan vui nghal a ni. Lalhlupuia hi kum 1961 khan piangin thuthar thehdarhna kawnga nasa taka a thawh bakah tlawmngai pawl hrang hrang ah inhmangin Village Council-ah pawh tum 7 lai thlantlin niin President hna te pawh a lo chelh tawh a, kum 1987 khan Lalrikhumi nen inneiin fa 5 an nei a ni.

Zoram Medical College & Hospital (ZMC&H) Governing Body chu nimin khan an Chairman leh Chief Minister Lalduhoma hova thukhawmin hmalakna leh hmachhawp hrang hrang an thlirho.

India hmarchhak-a a hmasa ber turin ‘New Age Tech Skills Centre’ chu nimin khan School Education Minister Dr. Vanlalthlana chuan Aizawl Model Veng-a Govt. Comprehensive Model School-ah a hawng.

Champhai District tlawh mektu Union Minister of State for Housing & Urban Affairs Tokhan Sahu chuan nimin khan Champhai khawpui chhung hmun hrang hrang a tlawh.

Mizoram Upa Pawl (MUP) leh Art & Culture Department tangkawp buatsaih ‘MUP Lengkhawm Zai Intihsiak 2026’ chu nimin khan Aizawl Vanapa Hall-ah neih a ni a, Aizawl khawpui-a Area Level-a intihsiakna a pakhatna theuh Branch 14 ten intihsiakna neiin a pumpui ah Mission Vengthlang chu pakhatna niin Bungkawn leh Armed Veng ten an dawt a ni.

School Education Minister Dr. Vanlalthlana chuan nimin khan Chaltlang-a MBSE Office-ah Performance Assessment, Review and Analysis of Knowledge for Holistic Development (PA-RAKH) Cell a hawng a, NCERT, New Delhi PARAKH-a CEO & Head, Prof. Indrani Bhaduri chuan khualzahawm niin Video Conference-in he hun hi a telpui a, Prof. Indrani Bhaduri chuan PARAKH chu National Assessment Centre atan Ministry of Education hnuaiah NCERT campus chhunga din a nih thu leh India rama Education Board hrang hrangte assessment system intluktlang zawka kalpui leh competency-based assessment kalpui thei tura buatsaih chu a tum a nih thu a sawi bawk.

Mizoram Larsap General (Dr) Vijay Kumar Singh chuan nimin khan Post-Matric Scheduled Tribe Scholarship Scheme hnuaia hamthatna dawngtu zirlaite kawmin zirlaite chu Tribal Scholarship leh Scheme dangte midangte hrilh hriaa thehdarhtu nih tum turin a fuih bawk.

Land Revenue & Settlement Minister B. Lalchhanzova chuan nimin khan online hmanga Chhiah pekna portal Online Tax Portal Version 2.0 - ‘landtax.mizoram.gov.in’ chu a hawng.

Nimin khan Khawzawl-ah Narco Coordination Centre (NCORD) thukhawm neih niin ruihhlo dona kawnga an hmalakna hrang hrangte thlirho a ni a, he huna tarlan a nih danin kumin chhungin Khawzawl District-ah Heroin gram 521 man ni tawhin hei hi Rs. 1,03,08,000/- man nia chhut a ni a, Methemphetamine pawh kg 13.87 man ni tawhin hei hi Rs. 1,09,60,000/- man nia chhut a ni bawk. Heng ruihhlo kaihhnawih ah hian thubuai 14 ziahluh niin mi 25 man an ni tawh bawk. Khawzawl District hi Mizoram-a NCORD Dedicated Helpline number nei awmchhun niin ruihhlo kaihhnawih report duh tan Ph. No. 8119080266-ah biak theih a ni.

Special Intensive Revision (SIR) 2026 atana inbuatsaihna kal zelah Serchhip District chhunga khaw pali (4)-ah niminpiah khan Political Party a Booth Level Agent tura ruat te tan SIR chungchang inhrilhfiahna leh zirhona neih a ni.

Music Domain Mizoram (MDM) Serchhip District chuan nimin khan Bukpui P&E Rest House-ah kum 2026-2027 chhunga hruaitu tur thlanna neiin President-ah Vanlalhruaia (IOC Veng); Vice President-ah PC. Lalremruata (Bukpui); Secretary-ah VL. Dinsanga (New Serchhip North); Asst. Secretary-ah Lalropuia Sailo (New Serchhip North); Treasurer-ah R. Laithangpuii (AOC Veng) leh Fin. Secretary-ah Laldinpuii Sailo (AOC Veng) te thlan an ni.

Serchhip District Amateur Taekwondo Association (SDATA) chuan nimin khan Serchhip IOC veng-a SDATA Academy Do Jang-ah 1st Session Colour Belt Exam an buatsaih a, Mizoram Amateur Taekwondo Association (MATA) Headquarters atangin Examiner Felix Lalnunpuia 1st Dan Black Belt chuan a rawn endik a ni. Tun tuma SDATA in Colour Belt Exam an buatsaih ah hian White Belt-ah mi 13 leh Yellow Belt-ah mi 26 bakah Green-I Belt leh Green Belt-ah mi pakhat ve ve bakah Blue Belt-ah mi pahnih, an vaiin mi 43 an exam a ni. Belt Exam hawnna hi SDATA Vice President VL. Ramhluna kaihhruaia neih niin Secretary Anthony Lalneihmawia chuan inlawmna thu a sawi a, SDATA Treasurer Zoramthara chuan fuihna thu a sawi bawk a ni.

Union Minister of State for Housing & Urban Affairs Tokhan Sahu chuan nimin khan Champhai tlawhin sawrkar hotute nen Champhai Circuit House-ah an inkawm.

Alpha Hospital, Kulikawn chuan Mizoram Universal Healthcare Scheme (MUHCS) zawmin Mizoram State Healthcare Society (MSHCS) hotute nen inremna an ziak ta a. Heti hian Alpha Hospital telin Mizoram-a mimal/kohhran damdawi In 17-in MUHCS an zawm tawh a ni.

Union Minister of State for Housing & Urban Affairs Tokhan Sahu chuan nimin khan Champhai tlawhin Champhai Circuit House-ah sawrkar hotute leh khawtlang hruaitute nen an inkawm a, Union Minister chuan sawrkar Scheme hrang hrang mipuiin an la hriat hnem tawk loh, tangkai pui theih deuh tur si a la awm teuh tih sawiin, chung chu hriat tuma hmang tangkai turin mipuite a sawm bawk. Union Minister hian Pradhan Mantri Awas Yojana - Urban (PMAY-U) leh Deendayal Antyodaya Yojana - National Urban Livelihood Mission (DAY-NULM) hnuaia hamthatna dawngtute kawmin Mualkawi-a Solid Waste Management Centre pawh a tlawh nghal a ni.

Mizoram People Forum (MPF) Governing Board chu nimin khan an President Rev. John Raldosanga kaihhruaiin Synod Committee Room-ah an thukhawm a, April 21, 2026-a Aizawl Municipal Corporation (AMC) Inthlanna neih zawh taka MPF chetvelna leh hmalakna te thlirletin Inthlanna thianghlim neih a nih theihna tura Local Forum leh Constituency Forum te theihtawp chhuahna ah leh an huamchhung hneh taka an vil chu lawmawm an tih thu an sawi a. Hmun thenkhat ah MPF leh Political Party Thawhhona Thuthlung hriatchian tawk lohna te pawh a la awm nia a lan thu sawiin, chutihrualin inthlanna tluang taka buatsaih a ni chu lawmawm an tih thu an sawi bawk. He hunah hian kumin-a MPF hmalakna tura ruahmanna te sawiho a ni a, thalai leh zirlaite hnena Sawrkar tha (good governance) pawimawhna inzirtir te, Media chakna hman tangkai te bakah kawng hrang hranga hmalak dan tur te am sawiho a, November 6, 2026-a MPF Annual General Meeting neih tur atana inbuatsaihna turte pawh an thlirho nghal bawk.

Health Minister Lalrinpuii chuan nimin khan Mizoram Government Nursing Service Association (MGNSA) Conference hmanpuiin Nurse te indaihlohna phuhru turin hmalak mek a nih thu a sawi a. Hei bakah hian Aizawl Civil Hospital leh ZMC&H tihchangtlunna kawngah hmalak mek zek a nih thu a sawi bawk.

Muslim ni pawimawh, Id-Ul Zuha (Bakrid) chu nimin khan hmun hrang hrangah hman niin Mizoram-ah pawh Aizawl Mosque Committee huaihawtin zing dar 8:00 khan Lammual-ah tawng-taina hun hman a ni. He hunah hian Aizawl Mosque Committee & Muslim Welfare Society Mizoram-a General Secretary Md. Mamon Majumdar chuan, Id pual hian Mizoram mipui chibai bûkin, duhsakna a hlan a. Mizoram sawrkar, YMA leh mipuite nen thawhhona tha an nei chu lawmawm an tih thu leh thawhhona tha neih zel an duh thu a sawi a. Dan zawm chu khua leh tui thate tih tur a nih avangin Inner Line Permit (ILP) chungchang ah dan zawm ngaite tha taka zâwm turin Mizoram a Muslim awmte chu a chah a. Mizoram leilung faten hnathawh tur an pek avanga chhungkaw chawma ei hmu an nih thu sawiin, kutdawh leh harsatna siam zawnga khawsakte ti lo turin a fuih bawk.

Gauhati High Court, Aizawl Bench chuan Mizoram University (MZU)-a Registrar nilai Prof. Lalnundanga chu MZU Registrar a nihna a hlih sak.

Mizoram sawrkar in Tourism Director tura a ruat R. Lalrodingi chuan nimin khan Chief Minister Lalduhoma hnenah he hna chelh tura ruat a nihna atanga a inhnuhdawh thu a thlen.

Mizoram sawrkarin ruang phurh man a tum sakna, 'Assistance for Transportation of Bodies of Deceased Persons within Mizoram' kaltlangin tun thla chhung hian ruang 154 phurhna atan Rs. 10,63,813 a pechhuak tawh a, ruang phurh man 13 te chu Online hmanga dil a ni.

ZU LEH KEI - Rev. Dr. Zaichhãwna Hlâwndo

North Eastern Council (NEC) chuan 15th Finance Commission (2022–26) hun chhungin Mizoram-ah Healthcare, zirna, Inkalpawhna kawngpui, Tourism, Agriculture leh mamawh hrang hrang ah hmasawnna hna lian tam tak a thawk.

RUSA Assistant Professor Association of Mizoram (RAPAM) chuan Mizoram sawrkar in RUSA Assistant Professor te dahnghehna tura thutlukna a siam ta chu an lawm takzet tih thuchhuah siamin an tarlang a, RAPAM chuan RUSA Assistant Professor te UGC Regulation 2018 hmanga MPSC in Open Advertisement kaltlanga dan dik taka a nghet tura kum 2019-a a lak te an nih thu pawh tarlangin, “Hun rei tak chhung kan chanvo tur kan chan theih loh hnuah sawrkar in kan chanvo dik tak min pe tura thutlukna a siam ta hi kan lawm takzet a ni,” tiin Chief Minister, H&TE Minister leh DP&AR Minister te chungah lawmthu an sawi bawk.

National Youth Muaythai Championship vawi 7-na chu karleh Thawhtanni, June 1, 2026 atanga June 4, 2026 chhung khian Haldwani, Uttarakhand-ah neih a ni dawn a, Mizoram aiawh turin player 19 te chuan Vawiin hian Aizawl an chhuahsan dawn a, an zingah hian Serchhip atangin Phoibi Malsawmtluangi Sailo, New Serchhip a tel a, kg. 57 chin inelna ah a khel ang. Mizoram Team hi Manager V. Lalmuankima leh Coach Ngurlianzuala Sailo ten an hruai dawn a. Anni bakah hian Referee & Judge turin Liansangpuii Renthlei leh Lalhlimpuia te an kal dawn bawk a ni.

Tunhnai khan Mizoram Finance & Accounts Service (MF&AS) Officer thenkhat te awmna hmun siksawi niin Serchhip-a Treasury Office nilai Alvina Ramdinthari chu Directorate of Rural Development-ah Deputy Director (F&A) hna chelh tura sawn a ni a, a aiawh tur hian Directorate of SW&TA-a FAO nilai Vanlalhma-ngaihi chu rawn dah a ni.

Rampum-a ‘Solar Month’ hman mek denchhenin nimin khan Serchhip-ah PM Surya Ghar: Muft Bijli Yojana (Rooftop Solar Installation) chungchang inzirtirna hun hman a ni a. Serchhip District-ah he hmalakna hnuaia hamthatna dawng hi mi 16 vel chauh an la awm thu he hunah hian tarlan a ni.

Walkie Talkie - Remchànna ngê, dàn bawhchhîatna zâwk? - Lalchhuansanga Pachuau

Nimin khan Chief Minister Lalduhoma hovin a Pisa-ah kawlphetha MW 132 pechhuak thei tur Tuivai Hydroelectric Power Project chungchang chu P&E Minister F. Rodingliana leh P&E Department-a thawktu ten an sawiho.

Art & Culture Department hmalaknaa Cham-phai District chhung Dungtlang khaw bula hmunhlui zirchianna atanga carbon sample an lakchhuah zirchianna a an thil hmuhchhuah chu nimin khan Art & Culture Minister C. Lalsawivunga chuan a Pisa-ah a pung.

All Mizoram Farmers' Union (AMFU) General Assembly vawi 19-na chu nimin khan Champhai Kahrawt Veng-a Thangtea Hall-ah neih a ni a, he hun hi Champhai Addl. DC Lalbiakfela chuan khuallian nia hmanpuiin kut-hnathawktute chu kan ram tungdingtute an nih thu leh an tel lo hian Mizoram in hma a sawn theih a rin loh thu a sawi a. Mizoram hmasawnna thlentu ni zel turin a chah bawk. AMFU General Assembly-ah hian Report hrang hrang an ngaihthlak bakah an pawl hruaitute atangin thusawi ngaihthlak a ni a, chawhnu lamah Rorelna hun hmangin an pawl hruaitu tur an thlang nghal a. He hunah hian Serchhip atang pawhin AMFU hruaitu mi pathum an kal a ni.

Tunhnaia Aizawl khawpui chhunga insual-rawnna thlenga mi pakhat sawisatu te chu man an ni tawh. Aizawl SP Zosangliana sawi danin tunkar Thawhtanni zanlai pelh hnu khan Aizawl Chanmari-ah insualrawnna hi a thleng a, Chan-mari Veng tleirawl Vanlalbeiseia (19) chu Ramhlun North tleirawl panga - Lalrambeiseia Hrahsel (18), Samuel Lalhruaitluanga (18) leh Zodintluanga (18) te bakah an thiante pahnih kum tling lo chuan an sawisak rawn a ni. Mi kutthlak rawntute hi man an ni tawh a, an chhungte lamin inrem an duh a, hetihlai hian Police chuan case an ziaklut a, kum tling lo pahnihte hi Remand Home-ah dahluh tur niin, kum tling chin mi pathumte chu Jail a dahluh tur an ni thung.

Mizoram Tourism Service Association (MTSA) chuan Tourism Department Director atana sawrkar in R. Lalrodingi a rawih nawn an thlawp thu leh Director atana dah a nihna dodal zawnga pawl pakhat hmalakna awm mek chu pawi an tih thu an sawi.

Nimin khan Hnahthial-ah District Level Committee for Encloser of Work under MGNREGA chu an Chairman leh Bawrhsap, K. Vanlalruati hovin an thukhawm a, he hunah hian District Rural Development Office (DRDO) Project Director HD. Lalpekmawia chuan July ni 1 atangin Viksit Bharat – Guarantee for Rozgar and Ajeevika Mission (VB-G RAM G) hman tan a nih tawh dawn thu leh hemi hma hian MGNREGS hnathawh mek la fel lo awmte chingfel tura thukhawm an nih thu a sawi a. Tun dinhmunah hian hnathawh zawh vek tawh, sum leh pai pawh pekchhuah vek tawh si, Management Information System (MIS) lam Technical thil avanga complete theih loh hna pariat (8) a la awm thu a tarlang a. Heng te hi District Level Committee for Encloser of Works under MGNREGA hian an ngaihtuah tur a nih thu sawiin, heng te hi a chinfel dan tur an sawiho a ni.

Former Councillors’ Association of Mizoram Municipalities (FOCAM) chuan nimin khan Aijal Club-ah inkhawmpui vawi 6-na hmangin Art & Culture Minister C. Lalsawivunga chuan a hmanpui a, Municipality leh Corporators-te mawhphurna chu mipuiin an hrechiang chho mek tih sawiin, Corporators-te chu Aizawl hmasawnna fawng vuantu pawimawh tak an nih thu leh hemi kawngah hian FOCAM chu Corporator-te a tul huna puitu ni thei tura inhawng turin a chah a ni. FOCAM hian Mizoram huam thinin nimin-ah hian Dan siam-that a ni a, tunah chuan AMC-a Councillor/Corporator-te chauh a huam tawh dawn a, an pawl hming pawh ‘Former Corporators' Association of Aizawl Municipal Corporation’ tia thlak a ni.

Aizawl khawpui chhunga City Bus te an Stand siam-ah rei tak ding lova passenger luh leh chhuah hun chhung chiah an dinna, Pick & Drop System chu chu nikum lama enchhinna neih a nih hnuah thla thar, June 1, 2026 atang khian he System hi a taka hman tan a ni dawn.

India rama Court sang ber, Supreme Court chuan Election Commission of India (ECI) in a bik taka Electoral Roll ennawnna, ‘Special Intensive Revision’ (SIR) an kalpui thei tih nimin khan nemnghetin, Article 324 hnuaiah ECI hian inthlanna felfai leh dik taka an kalpui theihna turin thuneihna zau tak an nei tih a sawi.

Home Minister K. Sapdanga chuan Police mi 350 lak leh tum an nih thu sawiin, Excise Minister Lalnghinglova Hmar pawhin Recruitment Rules thar hnuaiah Constable tha tak tak an lak dawn thu a sawi bawk.

Mizoram Rajya Sabha MP K. Vanlalvena chuan niminpiah khan Washington DC-a India ram aiawh World Bank hnathawktu, Parameswar Iyer IAS, Executive Director leh a thawhpuite kawmin World Bank sum hmanga Mizoram hmasawnna tur Infrastructure chi hrang hrang din theih dan tur a sawipui a. He hunah hian Multipurpose Rain Water Harvesting Project, Large Scale and Small Scale Bamboo Industry, Agro-Based and Forest Based Industry din dan tur leh Aizawl khawpui chhunga World Bank sum hmanga Flyover Bridge leh Solar Powered Portable Outdoor Step siam dan turte a sawipui a ni. He hunah hian World Bank Official te hian a thu thlen te chu thil tih theih vek a nih thu an lo hrilh a ni.

 

Mizoram-a Electoral Roll siamthatna, Special Intensive Revision, 2026 chu kalpui chhoh tan mek a ni a, nimin khan Serchhip District-a Booth Level Officer (BLO), Additional BLO leh Supervisor-te pualin SIR 2026 chungchang zirhona neiin he hun hi Serchhip Bawrhsap leh District Election Officer Paul L. Khuma chuan a telpui a ni.

Serchhip District chhunga Lungkawlh ram ah nimin khan Heroin nia hriat Hawng 91 zet man a ni a, hemi kaihhnawih ah hian mi pahnih man an ni bawk.

Agriculture & Farmers Welfare hnuaia scheme pakhat, Pulses Mission hnuaia District hrang hranga loneitu mi 3700 te chin tur Behliang chi quintal 245 chu nimin khan Directorate of Agriculture & Farmers Welfare Office tual atangin Agriculture Department Minister PC. Vanlalruata chuan a vailiam.

Mizoram-a ni zung chakna hman tangkai zel a nih theihna turin nimin khan PM Surya Ghar: Muft Bijli Yojana (Rooftop Solar Installation) inhriattirna leh Celebration of Solar Month chu Aizawl-a Secretariat Conference Hall No. 1-ah hman a ni a, Power & Electricity Department changtu Minister F. Rodingliana chuan a hmanpui a ni.

Hnahthial Bawrhsap K. Vanlalruati chuan nimin khan Hnahthial District chhunga Village Council pali - Leite, New Kawnpui, Lungleng South leh Aithur te hnenah Rashtriya Gram Swaraj Abhiyan (RGSA) atangin Computer Set a hlan a, sawrkarin khawtlang hruaitute chu a duhsak avangin theih ang anga thuamthat a tum thu leh Computer Set dawngtu VC-te chu a lawmpui rualin Computer chu thil chhe awlsam leh enkawl uluk ngai a nih avangin VC tinte chu a enkawltu tur bik ruat a, a khawih thiamte chauh khawihtir turin a chah a. Mimal tan ni lova khawtlang tana hmang theuh turin a chah nghal bawk.

Mizo Zirlai Pawl (MZP) ten Tourism Director atana R. Lalrodingi rawih nawnna order sut tura an ngenna hmalakna kal zela Tourism Pisa kal tur tur an dan chu nimin khan chhunzawm leh niin sawrkar atangin thu thar engmah hriat ala awm lo tih an sawi a. Tourism Director hi a bang emaw, order hi sut emaw anih loh chuan Vawiin, May 27, 2026 hian Tourism Pisa kal tur hi dan leh tur a nih thu an sawi bawk.

Chalfilh Bialtu MLA leh Assembly Speaker Lalbiakzama chuan tunkar Thawhtanni khan a Bial chhung atanga HSSLC Distinction-a pass thar te hnenah chawimawina thuziak leh pawisafai a hlan a, a Bial chhung Topper 3 - Lalnunfeli, Sesawng, Pricilla Zodinpuii, Phullen leh T. Laldinthara, Sesawng te chu sawrkar hna a lut tura an lo inbuat-saih lawkna atan Coaching Fee a tum sak nghal bawk a. Tlanglian Academy Online Coaching te nen ‘Civil Services Group ‘A’ Level Preliminary Course’ atan Sponsorship Agreement an ziak nghal a ni.

Zoram Medical College and Hospital (ZMC&H) chuan an zirlai kumin-a MBBS zirchhuak te pualin nimin khan ZMC&H-a Lecture Hall-4 ah ‘Graduation Day’ an hmang a, he hun hi Health Minister Lalrinpuii chuan khuallian nia hmanpuiin Graduate thar te a lawmpui thu a sawi a, Doctor indaihlohna pawh engemaw chen chu a phuhruk ngei a rin thu sawiin, zirlaite hian an zir hmain an zir zawh hnuah kum hnih (2) chhung Mizoram sawrkar hnuaia thawk turin inremna an lo ziak tawh tih a sawi bawk. Kumin-a Graduate tharte hi Batch thumna niin kum 2021 February atangin zirna bul an tan a, Final exam hmachhawn zirlai 98 zinga 96 te chu Graduate theiin pass percentage chu 97.95% a ni. Nimin-a hun hman ah hian Zirlai titha bikte hnenah lawmman sem niin Alex Vanlalruatkima, C. Lalhmachhuani, leh Zosangpuii ten an dawng a, zirna piah lama activities hrang hranga zirlai titha chawimawina, Col. VL. Ruata Award chu Paul Ngurthantluanga Vanchhawng hnenah hlan a ni bawk.

Central YMA chuan Mizoram-a Electoral Roll endikna runpui, Special Intensive Revision (SIR) neih turah khua leh tui dik tak ten an chanvo an neih ngei theihnan leh Electoral Roll dik leh rintlak neih anih theihnan theihtawp chhuah an tum thu an sawi.

Land Revenue & Settlement (LR&S) Department changtu Minister B. Lalchhanzova chuan Revenue Administration changtlung leh tha neih chhoh zel tumin Mizoram sawrkar chuan tan a la chho mek tih a sawi.

Rural Development & Administration Department (RD&AD) changtu Minister Prof. Lal-nilawma chuan nimin khan ‘Panchayat Advancement Index (PAI) 2.0 Report card’ a tlangzarh.

India Hmarchhaka Cricket tihhmasawnna nana State paruk intelkhawmna, North East Cricket Development Council (NECDC) chuan kumtin a an tih thin angin Season liam ta (2025-26) chhunga Board of Control for Cricket in India (BCCI) Tournament-a chethate hnenah lawmman semin Mizoram atangin mi pali in lawmman an dawng a ni.

Chief Minister Lalduhoma chuan Department thenkhat ten Vigilance Case an nei nual tih sawiin, Case nei Department te chu lo tang thar a, Case nei lo tura inbuatsaih vek turin a chah.

Health Minister Lalrinpuii chuan nimin khan Zoram Medical College and Hospital (ZMC&H)-ah Mizoram-a a hmasa ber ni turin Interventional CT Scan a hawng a. He khawl thar, u-CT 780 Model, 128-Slice CT Scanner System hi cheng vbc. 8.18 man niin AI (Artificial Intelligence) hmang a ni a, thlalak fiah zawk leh radiation tlem zawk pechhuak thei tura duan niin Lung lam thalo te, naupang te leh Cancer enkawl nana tha bik a ni.

Mizoram-a rawn zin Union Minister of Fisheries, Animal Husbandry and Dairying, Rajiv Ranjan Singh chuan nimin khan State Government Fisheries Farm atangin Sangha khawitute hnenah Sangha chi leh Sangha chaw a sem a. Union Minister chuan sawrkar laipuiin Sangha khawitute tan hmachhawp tam tak a neih thu sawiin, India ram chu khawvela Sangha tharchhuak hnem ber pawl a nih rualin hmarchhak State te tharchhuah chu tun aia la tam thei a nih thu a sawi a. Mizoram theihna haichhuah kawnga tanlak pui turin Sangha vulhtute chu a sawm bawk. He hunah hian Union MoS Prof SP Singh Bagel leh George Kurian bakah mi pawimawh te an tel a ni.

Nimin khan Serchhip-ah District Level Narco Coordination Centre (NCORD) Committee thutkhawm neiin April 1, 2026 hnu lama ruihhlo dona kawnga an hmalakna hrang hrang te thlirho a ni.

Nimin (May 25, 2026) tlai-ah ruahsur ah khan Serchhip Tuikhuah Veng-a Retaining Wall siam lai pakhat chu chimin mihring thi leh hliam na lutuk an awm lo hlauh nia thudawn a ni.

Mizoram-a rawn zin Union Minister of State for Fisheries, Animal Husbandry & Dairying and Panchayati Raj Prof. SP. Singh Baghel chuan nimin khan Aizawl-a BJP Party Office tlawhin State President's Office Chamber-ah an President Dr. K. Beichhua MLA kaihhruaiin an inkawm a. BJP hruaitute hian Mizoram mamawh hrang hrang lo thlenin, Prof. SP. Singh Baghel chuan an thu thlente chu a ngaih pawimawh thu a sawi a, BJP Mizoram hruaitu ten a Department chan hnuaia Mizoram mipui harsatna chungchang an sawipui chu lawmawm a tih thu leh an thu thlen te a tul anga a bawhzui sak tur thu a sawi bakah a tul anga New Delhi lamah pawh bawhzui turin a chah bawk.

Election Commission of India-a Secretary Binod Kumar chuan nimin khan Champhai tlawhin Champhai District a DEO, EROs, AEROs, BLO Supervisor leh BLO te chu Special Intensive Revision 2026 chungchangah a kawm a. Special Intensive Revision 2026 kalpui tan mekah hian BLO te'n mawhphurhna lian tak neiin anmahni ah an innghah tlat avangin theihtawp an chhuah a ngai tih a sawi a, Champhai chu Myanmar ramri a awm a nih avangin SIR tihhlawhtlin a pawimawh lehzual tih sawiin, SIR kalpui tura dan leh hrai awmte hrechiang turin a chah a, awlsam zawka an kalpui theihna tura ruahmanna felfai tak siam tura chahin, hemi hnu hian Zokhawthar Polling Station a tlawh nghal a, VC leh YMA hruaitute nen an inkawm bawk a ni.

Nimin khan Chief Minister Lalduhoma hovin ‘Ginger USP Project’ kalpui dan tur sawihona neih a ni.

Union Minister of Fisheries, Animal Husbandry and Dairying Rajiv Ranjan Singh chuan hmarchhak Bial hmasawnna turin Prime Minister in hmathlir a neih thu leh chu hmathlir puitlinna atan Central Sawrkar chuan a theih apiang tih a duh thu a sawi.

Computerisation of Primary Agricultural Credit Cooperative Societies (PACS) Phase-II hnuaia Centrally Sponsored Project kalpui mek Hardware Distribution Programme chu nimin khan Cooperation Minister PC.Vanlalruata hovin RCS Conference Hall, Babutlang-ah hman a ni.

India rama khawchin thlirlawktu ber Indian Meteorological Department (IMD) thlirlawk danin Vawiin atang hian Mizoram-ah Fur a intan dawn a, Fur (Monsoon) hi June ni 1-ah thleng tlangpui mah se kumin hian ni 7 zetin a hma dawn niin an sawi. Nikum-ah khan May ni 27-a Fur intan tura ngaih a nih laiin May ni 24-ah a thleng tan a. Kum 2020 atanga nikum inkar chhunga Fur lo thlen tlai ber chu kum 2023 kha niin June 8-ah a thleng a ni.

India hmarchhak State hrang hrang pariat te chuan nimin khan Union Minister of Fisheries, Animal Husbandry and Dairying Rajiv Ranjan Singh-a hovin Regional Review Meeting an nei.

Union Minister for Fisheries, Animal Husbandry & Dairying leh Panchayati Raj Rajiv Ranjan Singh chuan nimin khan Thuampui-a MULCO hmun tlawhin Mizoram-a Cooperative Dairy Sector tihchakna tura hmalakna hrang hrang a tlangzarh.

Tun thla ni 18 atanga Siaha District-a neih Jan Bhagidaari IEC Campaign ‘Sabse Door, Sabse Pehle’ chu nimin khan zawhfel a ni ta a, PM JANMAN leh DA-JGUA hnuaia buatsaih he Campaign in a tum ber chu hmun kilkhawr ber thlenga chengte chu sawrkar atanga hamthatna Scheme hrang hrang hriattir a, an chanvo dik tak an chan theih nana tanpui a ni a. Siaha RD Block leh Tipa RD Block huamchhunga khaw 27-ah he hmalakna hi kalpui niin mipui 2,830 vel an tel a, nimin khan Siaha DC Conference Hall-ah he hmalakna hi Closing-cum-Debriefing Programme hman a ni.

Aizawl Zoological Park awm tirh atangin Ramsa leh Sava 12 a bo tawh a, tun thlengin hmuh let a la awm lo.

Mizo Zirlai Pawl (MZP) chuan Tourism Department Director atana R. Lalrodingi ruat nawn leh a nih duh loh lantir nan nimin khan Tourism Department-a hnathawkte Pisa kai tur an dang a. Ruahman lawk ang chuan Vawiin pawh hian dan chhunzawm leh tur a ni ang.

President Droupadi Murmu-i chuan nimin tlai khan New Delhi-a Rashtrapati Bhavan-ah Civil mite chawimawina sang, Padma Award a sem a, tun tumah hian Padma Awards 66 - Padma Vibhushan 2, Padma Bhushan 6 leh Padma Shri 58 hlan niin kumin hian President hian Padma Award 131 sem turin a pawm a, heng zingah hian hmeichhia 19 leh mi 16 chu thih hnua chawimawina dawng tur an ni.

Kristian te ni pawimawh, Pentikos ni chu nimin Pathianni (May 24, 2026) khan Kohhran hrang hrang ten urhsun takin an hmang a, Pentikos Ni hi Thuthlung hlui hunah chuan Kalhlen Kut tiak ni atanga ni 50-na ah hman thin niin Thuthlung thar hunah chuan Isua Krista thihna hneha a thawhlehna ni (Easter) atanga ni 50-na ah hman thin a ni a. Kohhran hrang hrang ten he ni pual hian thupui thlan bik neiin urhsun takin inkhawm an nei a ni.

Persons with Disabilities (PwD) Commissioner Vanlaldiki Sailo kaihhruai Access Audit Team-te chuan Zirtawpni khan Serchhip-a sawrkar Pisa leh hmun pawimawh te tlawhin rualbanlo (vohbik) te tana awlsam zawka luh chhuah theihna siam dan enfiahin Access Audit an nei.

Serchhip Chanmari Branch YMA te chuan Inrinni khan a mamawh apiang te hman atan Ser-chhip Blood Bank-a dah turin thisen Unit 16 an pe a, thisen petute hi mipa 13 leh hmeichhia 3 niin heng mi tlawmngai te hi Serchhip Blood Bank-ah kalin thisen hi an pe a ni.

Mizoram sawrkar chuan kum 2026-a sawrkar Pisa chawlh a lo tihchhuah tawh ah sawrkar Pisa chawlh-a tarlan, May 27, 2026 Id-Ul-Zuha (Bakrid) chu May 28, 2026-ah hman a nih dawn tak avangin sawrkar chawlh chu May 28, 2026 (Ningani) ah sawn a ni tih Inrinni khan GAD chuan thuchhuah a siam a. Hemi ni-ah hian Sawrkar Office zawng zawng, Public Sector Undertakings, Educational Institutions leh Banking Institutions te chu khar vek a ni ang.

Serchhip District-a Prime Minister Dharti Aaba Janjatiya Gram Utkarsh Abhiyan (PM-DAJGUA) kalpui dan thlirletna chu Zirtawpni khan Serchhip Bawrhsap Paul L. Khuma hovin neih a ni.

Mizoram Agriculture Marketing Board (MAMB)-in Mizoram-a thar Sawhthing lei leh hralhna tura a ruahman Secondary Collection Centre (SCC)-ah Sawhthing quintal 1,36,985.96 lei/hralh a ni tawh a. Nikum lama Sawhthing lei zat erawh a la phak lo hle.

Mizo Zirlai Pawl (MZP) General Hqrs. chuan Chief Minister Lalduhoma chu Tourism Director atana pension tawh R Lalrodingi dah nawn leh chungchangah 'dawt' sawiah puhin Vawiin hian Tourism Pisa kai tur dan an rel a, hmalak zel an tum thu pawh an sawi bawk.

Formosa Foundation chuan Inrinni khan Central YMA kaltlangin Branch YMA leh tlawmngai pawl dang te hnenah Oxygen Concentrator 500 an semchhuak a, hemi puala hun hman hi Chief Minister Lalduhoma chuan a hmanpui a ni.

Inrinni khan Lungdai khuaa cheng Kapchhuanmawia chu Micky Malsawmtluanga chuan Chemte in a vithlum a, pawikhawihtu hi Police te chuan man nghalin Kapchhuanmawia hi nimin khan vuiliam a ni. Thudawn danin kum 52-a upa Kapchhuanmawia leh Micky Malsawmtluanga (45) te hian zu an rui a, an inhial thinrim chu Micky Malsawmtluanga hian Kapchhuanmawia hi Awm-ah Chemte-in vawi hnih a vit a; a thi zui ta niin an sawi. Kapchhuanmawia ruang hi Lungdai PHC panpui a ni a, Postmortem a nih hnuah nimin khan vuiliam a ni a. Pawikhawihtu Micky Malsawmtluanga hi Police-in an man nghal a, Forensic lam pawhin thil thlen dan an enfiah nghal a ni.

Mizo Zirlai Pawl (MZP) chuan Mizoram Public Service Commission (MPSC) buatsaih Jr. Grade of MAH&VS Direct Recruitment chungchangah thil fel lo a awm ngei nia an hriat thu sawiin, MPSC thuneitute chu an thil tih dik tawk lo ah mawhphurhna la ngam tur leh he hna lakna kaihhnawih thil zawng zawng pawh tun thla (May) ni 29 hma ngeia a bul atanga tan that a nih theih nana hma la tura an phut thu an sawi.

Sawrkar Laipui Ministry of Fisheries, Animal Husbandry & Dairying buatsaihin Vawiin hian Aizawl-ah ‘Regional Review Meeting: Northeastern Region 2026’ neih a ni dawn a, he hun kaihruaitu tur hian Union Minister for Fisheries, Animal Husbandry & Dairying Rajiv Ranjan Singh chuan Aizawl rawn thlengin Lengpui Airport-ah AH&Vety Minister C. Lalsawivunga leh Fisheries Minister Lalthansanga ten an lo dawngsawng a ni. Union Minister Rajiv Ranjan Singh hian Vawiin hian Pradhan Mantri Matsya Sampada Yojana (PMMSY) leh Fisheries and Aquaculture Infrastructure Development Fund (FIDF), kaltlanga hmasawnna tur project cheng Vbc. 32.15 hu a hawng nghal  dawn a ni.

Central YMA-in Ruihhlo do Street Campaign an neih mek chu Inrinni zing khan Aizawl Vaivakawn-ah chhunzawm leh a ni a, Central YMA atangin Ramsangliana CEC chuan thu a sawi a, Central YMA General Secretary Prof. Malsawmliana leh CEC memberte leh a chhehvel Branch YMA hruaitute an tel bawk. Central YMA hian Ruihhlo do Street campaign hi Aizawl khawpui chhung hmun 15-ah buatsaih a ni tawh a, tun thla ni 30-ah Lengpui-ah neih leh tura ruahman a ni a. Street Campaign hi mipuiin ruihhlo do a tul zia an hriatna tura infuihtharna hun rem-chang a nih avangin Central YMA chuan hlawk an tih thu leh a remchan angin chhunzawm zel an tum thu an sawi bawk.

Chief Minister Lalduhoma chuan, “Mizoram in ruihhlo vangin harsatna a tawk a, a mamawh ber nia lang chu chhungkua atanga bultan that a ni,” a ti.

Hauruang khuaa nu pakhat chuan nimin khan Lunglei Police Station-ah report thehlutin Inrinni zan-a lengchhuak a fapa K. Lalhlimpuia (25) leh a thianpa-a Jerry Lalnunfela (40) te chu an haw loh thu leh biakpawh theih an nih loh thu a thlen a, Police te chuan chhui zui nghalin Lunglei Sazaikawn leh Hauruang inkar-ah an Motor (i10) chesualin an ruang hi hmuh a ni a, anni bakah hian Lalrin-tluangi (24), Hauruang pawh a boral bawk a ni.

Nimin-a Mizoram rawn thleng Union Minister for Fisheries, Animal Husbandry & Dairying leh Panchayati Raj, Rajiv Ranjan Singh leh Chief Minister Lalduhoma te chu nimin khan Chief Minister Bangla-ah an inkawm a, Union Minister hi Union Minister of State for Fisheries, Animal Husbandry & Diarying George Kurian leh Central Official lian ten an rawn zui a ni.

Aizawl Traffic Police te chuan Inrinni zan khan Aizawl khawpui chhung hmun hrang hrangah mipui him zawk nan zan dar 9:00 atanga zing khawvar dawn thlengin Dan zawm lo dapchhuah beihpui thlakin mi 74 an man a, heng te hi Bike ri ring 12; License nei lova lirthei khalh 12; Chak lutuk/hlauhawm taka lirthei khalh 3; Rui chunga lirthei khalh 4 leh Helmet khum lo/wrongside-a tlan/tripple riding avanga man  mi 43 an ni. Traffic Police hotute chuan dan bawhchhiatna hrang hrang avanga khawpui chhunga chetsualna thleng thin titlem tur leh mipui him zawk nana hmalakna a ni tih sawiin, mipuite chu Dan zawm kawngah tan la turin an chah bawk.

Mizoram Handloom & Handicrafts Development Corporation Limited (ZOHANDCO) hmalakna in nimin khan Chhuanthar Tlangnuam-ah Puantah zirna, Handloom Training leh puantahna khawl (Zo Loom) semna neih a ni a, Bialtu MLA leh Agriculture & Farmers' Welfare Minister PC. Vanlalruata chuan khuallian niin a hmanpui a ni.

Nimin khan Serchhip-ah District Level Standing Committee on Special Intensive Revision (SIR), 2026 chu Bawrhsap Paul L. Khuma hovin an thukhawm a, Special Intensive Revision (SIR) neih tur chungchang an sawiho a ni.

Telecom Regulatory Authority of India (TRAI) te chuan nimin khan Serchhip-ah Consumer-te nena intawhkhawmna hun ‘Consumer Outreach Programme’ an buatsaih a, he hun hi District Bawrhsap Paul L. Khuma chuan hmanpuiin Telecom Regulation Act hnuaiah Consumer ten dikna chanvo (right) tam tak an neih thu a sawi.

Mizoram in Rajya Sabha-a Seat pakhat a neih luah tur thlanna chu June 18, 2026 khian neih a ni dawn.

School Education Minister Dr. Vanlalthlana chuan May 18, 2026-a Council of Minister thukhawmin School 51 te sawrkar School (provincialised) atana pawm dan sawifiahin, “Heng School-a Zirtirtute hi an qualified em tih endik vek a ni dawn.

Mizoram sawrkar chuan nimin khan thu-chhuah siamin Officer on Special Duty (OSD) nilai R. Lalrodingi chu Tourism Director hna lo chelh lailawk turin a ruat a, thuleh awm hma chu he hna hi chelh lailawk tura tih a ni. R. Lalrodingi hi a pension hnua tunhnaia sawrkar in a rawih nawn, zirlai pawl ten an dodal avanga rawih nawn a nihna sut leh tak kha a ni.

PHE Department Zone-II Chief Engineer Er. K. Zohmingliana chuan niminpiah khan Khawzawl-ah PHED Khawzawl Maintenance Sub-Division Office a hawng a, Maintenance Sub-Division Office hawn tak chu Khawzawl District mipuiten an tangkaipui ngei a beisei thu sawiin, PHE Staff-te chu an hna chu mipui rawngbawlna a ni tih hriaa theihtawp chhuah zel thin turin a chah a ni. PHE Khawzawl WATSAN Sub-Division chuan Khawzawl telin khaw 16 an bial anga, Maintenance Sub-Division hian khaw 12 a bial thung dawn a ni.

Rural Development & Administration Department changtu Minister Prof. Lalnilawma hovin nimin khan Planning Department Conference Hall-ah Rural Development (RD) Scheme hrang hrang hnuaia kum liamta chhunga hmalakna te thlirletna neih a ni a, District hrang hranga DRDO Project Director leh BDO te bakah RD&AD-a Official te an tel a ni.

State Sawrkar leh Autonomous District Council ten Dan-in a phut anga Minor Minerals (lung, balu, brick earth/clay) atanga Royalty (chhiah) hmuhte insem dan tur chu nimin khan Commerce, Industries, Geology & Mining Minister F. Rodingliana hovin a Pisa-ah sawiho a ni.

Bairabi leh Zamuang inkar Teirei Lui chunga Lei (Bridge) dawh thar chu nimin khan PWD Minister Vanlalhlana chuan a hawng a, he Lei hi NABARD loan cheng nuai 1365.60 hmanga kum 2017 atanga dawh niin Double Lane Build-up Steel Girder Bridge(BUSG) a ni.

International Day for Biological Diversity 2026 chu nimin May 22, 2026 khan Aizawl-a Assembly Annexe Conference Hall-ah hman a ni a, Environment Forest & Climate Change Department Minister Lalthansanga chuan a hmanpui a ni.

Forensic Science Laboratory (FSL)-a mi thiamte chu kum 2000 atanga kumin April thla thleng khan pawikhawihna hmun 1,841-ah kal tawhin FSL-a thawktute hian Police-ten an man pawikhawihtu hrang hrangte kutze thla (fingerprint) 5,982 an nei/kawl tha tawh bawk.

Food Civil Supplies & Consumer Affairs Minister B. Lalchhanzova chuan nimin zing khan Lunglei-a thuthar thehdarhtute kawmin Mizoram a Retailer te lawmman chu tihpun tum a nih thu a sawi a, “Card Var leh Sen-ah kg-ah Rs. 1.80 an hlawh thin chu reilote ah Rs. 2-ah tihsan a ni dawn a, Card Eng leh Pawl-ah kg-a Rs 2.85 an hlawh thin pawh Rs. 3-ah tihsan a ni dawn a, Carrying Bill pawh tihsan a ni ang,” a ti a. Supply Kudam-ah Digital Weigh Scale dah a ni chungin Buhfai buktute lakah Retailer-te leh mipuite an lawm vak lo ni awm ang a lang chungchangah siamthat ngai a la awm nual tih a sawi bawk.

Mizoram Sawrkar Flagship Scheme - Bana Kaih Scheme kalpui meka Loan dawng tawh Progress Partner leh Chief Minister Special Package dawngtute hmalakna thlirletna chu nimin khan Aizawl-a I&PR Auditorium-ah neih a ni.

Legal Metrology Department chuan nimin khan eirawngbawlna gas (LPG) khawih chinpentu nia hriat manin hremna pek an ni a, thudawn danin Zothan Gas Agency te chuan an Gas semchhuah turah buk tling lo a awm nia an rinhlelh chu Legal Metrology Department te hriattir in, Legal Metrology te chuan LPG domestic cylinder te chu endikin bur 306 lo thleng thara bur 259 te chu a buk tling lo ngei a ni tih an hmuchhuak a. A khawih chinpentu ni ngeia rinhlelh Truck driver Tera Moni (48), Ram Nagar, Silchar chu Section 30 of the LM Act, 2009 a bawhchhiat avangin hrem a ni. Gas bur buk tlinglo te hi thun khah that turin Agency leh IOC lamin hma an lak a ngai dawn bawk a ni. 

Mizoram in Rajya Sabha-a Seat pakhat a neih luah tur thlanna chu June 18, 2026 khian neih a ni dawn a, hemi ni hian State 10-a Rajya Sabha MP tur mi 24 thlanna neih a ni dawn a ni. Mizoram hian Rajya Sabha-ah Seat pakhat nei mekin tuna Rajya Sabha MP nilai K. Vanlalvena hun hi July 19, 2026-ah a tawp dawn a. He inthlanna chuh tumte tan hian June 8, 2026 thlengin hming pekluh theih a ni ang.

Thenzawl Peace City dinna tura thil pawimawh chi hrang hrangte chu nimin khan Serchhip Bawrhsap Paul L. Khuma hovin Consultant Firm, IPE Global Limited leh Department hrang hrang hotute’n an sawiho.

Mizoram-ah Sawhthing hralhna man a san chhoh zel avangin Serchhip District-ah pawh Secondary Collection Centre (SCC) hrang hrang kaltlangin Sawhthing hralh zawh thawkhat a ni tawh a, khaw thenkhat ah chuan kg-ah Rs. 55 te a ni tawh a ni.

 

Election Commission of India ruahman anga Special Intensive Revision (SIR) 2026 kalpui mek chungchang ah nimin khan Serchhip District-a Political Party te tan hemi chungchang inhrilhhriatna neih a ni a. Enumeration Form thehlut lo te chu Electoral Roll thar ah hian an hming a chuang thei dawn lo a ni.

Mizo Song Composers' Society (MSCS) chuan Artificial Intelligence (AI) hmanga Mizo hla phuah sa lo sak tir a, lo thehdarh tawhte chu la thla leh vek turin an ngen.

Rural Development & Administration Department (RD&AD) buatsaihin Mizorama a vawi khatna atan nimin khan Aizawl-a Vanapa Hall-ah Hmeichhia VC te Inkhawmpui, ‘State Level Convention for Women Elected Representative of Village Councils’ chu neih a ni.

India ram chhunga State leh Union Territory tina khawvel hmundangte el phak khualzinte tlawh duhna hmun (tourist destination) pakhat tal neih tura Sawrkar laipuiin a rel angin Mizoram tana hmalak dan tur sawihona chu nimin khan neih a ni.

Ministry of Culture kaltlanga India ram pum huapa kum 75 aia upa kut ziak (manuscript) hluite zawnchhuah leh vawnthat (digitalized) kawnga hmalakna, Gyan Bharatam Mission dinhmun te thlirin nimin khan Khawzawl-ah thutkhawm neih a ni a. Mizo Lal Zataia’n Superintendent of Lushai Hills hnena a lehkhathawn te, Kohhran lehkha hlui te, Lal Kairuma thlahte thuziah leh hmanlai atang tawha Biate khua chu khaw fai a nih zia ziahna te zawnchhuah a nih tawh thu tarlan a ni.

Aizawl Smart City Limited hnuaia cheng vbc. 10.65 senga siam ‘Hlimen Football khelmual’ (Playground) chu nimin khan UD&PA Minister K. Sapdanga chuan a hawng.

Nimin khan Lawngtlai-ah District Mineral Foundation Governing Council chu an Chairman leh Bawrhsap Donny Lalruatsanga kaihhruaiin an thukhawm a, he hunah hian District Mineral Foundation (DMF) kalphung inhrilhfiah niin DMF tum ber chu Pradhan Mantri Khanij Kshetra Kalyan Yojana (PMKKKY) kalpui a nih thu leh DMF hnuaia sum lakluhna - Royalty leh Fines chungchang leh a hmanna turte inhrilhfiah a ni bawk. He hunah hian Bawrhsap chuan Mining atanga Royalty leh Fines lut te dik leh tangkai taka hman a pawimawh thu sawiin, Mining atanga sum hmuh te chu dik, felfai leh langtlang taka enkawl a tul hle tih a sawi a, khawtlang leh ram hmasawnna tura hman a nih tur thu a tarlang bawk. He hunah hian DMF Fund an neih Rs. 1,29,314/- hman dan turte pawh sawiho a ni.

Smart Meter hman a nih hnua Electric Bill hmasa berah Bill lak hun chhung insiamrem nan a rei bik avangin thla dang aiin pawisa chawi a danglam phah ta deuh niin Power & Electricity Department hotute chuan an sawi.