STIP-2020 atan inrawnkhawm

Science, Technology & Innovation Policy (STIP) 2020 duan kawnga inrawnkhawmna chu nimin khan Video Conference kaltlangin rampum ah neih a ni a, State 26 leh UT 4 atangin Chief Minister, Deputy Minister leh Minister hrang hrang te telin Mizoram atangin RD Minister, Lalruatkima chu a tel a ni.

Union Minister of Science & Technology, Earth Sciences, Dr. Harsh Vardhan chuan he hun hi kaihruaiin Science, Technology leh Innovation lama Policy mumal tak neih a pawimawhzia leh Policy tha nei tura inrawnkhawmna pawh tum 300 chuang neih a nih tawh thu a sawi a, hripui kan tawrh meka ram chhung mamawh phuhruk kawnga Innovation pawimawhzia te leh helam kawnga State hrang hrangte thiltih mek inhriat pawh tawn pawimawhna te a sawi bawk.

Mizoram atanga tel RD Minister, Lalruat-kima pawhin thu sawiin Mizoram chhunga ramhmul hausakna kan neih te hei aia hmang tangkai lehzual tura tanlak pawimawhna te, tual-chher thiam (local innovator) ten awlsam zawka an thilsiam chhuah an tihral zung zung theihna tura market channel tha zawk siam pawimawhna te, ram chhunga Technology awm tawh sa awlsam zawka inhlan/inlei chhawn theihna tur Platform siam te, State hrang hranga Science & Technology Council awmte chak zawka hma an lak theihna tur thuamchak pawimawhna te a sawi bawk.

STIP Policy 2020 duan ah hian Central sawrkar hian Inrawnkhawmna hi thuang li (4)-a kalpuiin a Pakhatnaah mipui nawlpui leh mithiam bik te ngaihdan awmze neia lakkhawm a ni a, Pahnihnaah hian thupui thlanbikah mithiam bikte nena uluk taka inrawn khawmna neiin pathumna ah State sawrkar hruaitute ngaihdan lakkhawm a ni leh a, a Palina ah Science & Technology Stakeholders te nena inrawnkhawmna neih a ni leh bawk ang.