Lenkawl

Sub-Hqrs. YMA Serchhip-a Rorelna sang ber dawttu, Sub-Hqrs. YMA Coordination Committee (SCC) thutkhawm vawi 35-na chu Inrinni khan Sub-Hqrs. YMA Hall, Serchhip-ah neih a ni a, he thutkhawm ah hian April 30 leh May 1 chhunga Sub-Hqrs. YMA Inkhawmpui vawi 8-na Thenzawl Auditorium-a neih zawh taka an thurel hrang hrang bawhzui dan tur an ngaihtuah bakah Inkhawmpui neih zawh tak an thlirlet nghal a. Sub-Hqrs. YMA Budget leh Central YMA Budget te chu August 15, 2026 hmain Branch leh Group tin ten pek tlak vek tum nise an ti bawk.

Election Commission of India in ruahmanna a siam angin Mizoram-a Electoral Roll siam thar hna, Special Intensive Revision of Electoral Rolls, 2026 chu Inrinni, May 30, 2026 khan kalpui tan a ni ta a. BLO hrang hrang ten anmahni Bial-ah theuh Enumeration Form semchhuah hna an thawk tan a ni.

NHIDCL enkawlna hnuaia awm thin Ser-chhip khawpui chhung paltlangtu kawngpui chu PWD enkawlna hnuaia dah a nih hnuah siamthat hna thawh mek niin khaw awmdan in a zir chuan Vawiin, June 1, 2026 atang hian Blacktop hna tan tum a ni a, tun tumah hian Bituminous Concrete (BC) hmanga kawng hi siam tum a ni.

Sawrkar laipui Ministry of Rural Development a Joint Secretary Tanuja Thakur Khalkho-i chuan Zirtawpni leh Inrinni khan Serchhip District rawn tlawhin Rural Development Department hnuaia Mizoram State Rural Livelihood Mission (MzSRLM) hmalakna hrang hrangte a tlawh a. Zirtawpni khan Baktawng Tlangnuam-a MzSRLM hmalaknaa Furniture siamna leh Aluminium hmanga bungbêl siamna hmun te, Chhingchhip-a Ropuiliani Women Farmer Producer Company Limited te enkawl Aieng, Sawh-thing leh Hmarcha sawngbawlna hmun te tlawhin Inrinnni khan Thenzawl-a Vantawng Cluster Level Federation Pisa tlawhin, Self Help Group memberte hmalakna hrang hrangte a tlawh kual bakah Puantahna hmun te a tlawh bawk.

Mizoram RGGLV Distributor Association President Vanlalvuta Chinzah chuan Mizoram-a eirawngbawlna Gas dinhmun chu chhe lutuk a la nih loh thu sawiin, Gas erawh a thlen muan deuh thu a sawi.

Mizoram-a tharchhuah Sawhthing hralhnaah sawrkar chuan Support Price cheng vbc. 22.53 a pe tawh a; Support Price pek theih tura Secondary Collection Centre (SCC) kaltlanga Sawhthing hralh theih hun chu Inrinni, May 30, 2026 khan khar a ni.

India hmarchhak-a a hmasa ber turin ‘New Age Tech Skills Centre’ thar chu Zirtawpni khan School Education Minister Dr. Vanlalthlana chuan Aizawl Model Veng-a Govt. Comprehensive Model School-ah a hawng.

Mizoram tlawha lo zin Sawrkar laipui Ministry of Information and Broadcasting-a Joint Secretary Dr. K.K. Nirala hovin Inrinni khan Indian Institute of Mass Communication (IIMC) North Eastern Regional Campus, Aizawl-ah IIMC hna-thawh dan thlirletna neih a ni a. He hunah hian IIMC tihchangtlun dan tur hrang hrang te, Hostel tihchangtlun bakah Staff Quarters leh zirlaite mamawh dah belh dan tur bakah Degree Course siam belh chungchang te sawiho a ni. I&B Ministry-a Joint Secretary Dr. K.K. Nirala hian Zirtawpni khan Doordarshan Kendra Aizawl pawh tlawhin thawktute a kawm bawk a ni.

Central Bureau of Investigation (CBI) chuan Indian Air Force tana Lengpui ram-a mimal ram lei chungchanga dan bawhchhiatna awm ni a sawi chu an chhui tan.

Mizoram Independent School Association (MISA) chuan Inrinni khan Aijal Club-ah General Body Meeting neiin MISA School ten zirlaibu (textbook) ngawr ngawr duhtawk mai lova zirlaite kawng hrang hranga an thiamna leh theihna te an phochhuah theih nan Co-curricular lama inelna chu School leh naupangte inkarah a tam thei ang ber buatsaih nise an duh thu an sawi a, North East State tam zawk ten an Board Exam-a Topper te an tarlan vek lai-a MBSE in naupang thiamthei leh chawimawi phu ngawih ngawih te hmingthatna a thup bo chu tha an tih loh thu sawiin, Merit List, Subject Topper List leh Pass-na Division te ti lang leh turin sawrkar ah hmalak ni se an ti bawk. Hei bakah hian Mizo naupangte’n zirna sang zawk leh tha zawk an neih theih nana ICSE leh CBSE Board te zawm phalna NOC petu sawrkar leh Education Department chungah lawmthu an sawi bawk.

Synod Prison Ministry-in Mizoram-a Lung In 10 a zirchianna-ah Jail tang 76.7% te chu thalai kum 18 atanga kum 40 inkar an ni a, an tan chhan tam ber chu ruihhlo a ni.

Lengpui Airport cheithat hna chu thawh mek a niin hnathawh tura ruahman 95% vel thawh zawh a ni tawh a, harsatna dang a awm loh chuan June thla chhung hian zawhfel hman beisei a ni.

National Conference on Agriculture for Kharif Campaign chu Zirtawpni khan New Delhi-ah neih niin Mizoram atangin Agriculture Minister PC. Vanlalruata chu a tel a ni.

Zirtawpni kalta khan ‘State Review Meeting of Power and Housing & Urban Affairs, Mizoram’ chu Union Minister Manohar Lal kaihhruaiin neih a ni.

Mizoram Mixed Martial Arts Association (MISMA) buatsaih ‘MISMA Fight Night’ chu Inrinni zan khan Aizawl Mualpui Salem Veng-a R. Dengthuama Indoor Stadium-ah neih niin Chief Minister Lalduhoma chuan a hmanpui a, Special Guest UFC Flyweight Champion Joshua Van chu chawimawina hlan a ni.

Chief Minister Lalduhoma chuan Zirtawpni tlai khan Mizoram-a rawn zin Power leh Housing & Urban Affairs changtu Minister Manohar Lal Khattar chu Chief Minister Bangla-ah kawmin Power lama Mizoram hmasawnna tur thilte leh Then-zawl Peace City chungchangte a sawipui a. Chief Minister hian New Delhi-a Union Minister Manohar Lal Khattar-in a lo sawipui tawh thin Darzo Lui Pump Storage Project chungchang te, Mizoram in Power Evacuation Line a mamawh belh dan te, RDSS hnuaia hmalak mek te leh Rooftop Solar installation lama hmalakna te a sawipui a. A enkawl Ministry hnuaia 10% GBS hmanga Mizorama hmalakna kalpui turin a lo ngen bawk. Heng bakah hian Chief Minister hian MoHUA atanga Thenzawl Peace City dinna tur bultanna Master Plan thawhna tur a pek avangin lawmthu a hrilh a. Tluang taka hmalakna a kal thu hrilhin, Union Minister hian Chief Minister thil thlente hi a theih anga a lo bawhzui tur thu a sawi a ni.

Mizoram Universal Health Care Scheme (MUHCS) hnuaiah Zirtawpni khan damlo inenkawlna Bill Rs. 3,72,15,361 pekchhuah a ni a, he sum pekchhuah hi damlo mi 1,348 te inenkawlna a ni a. Mizoram chhunga pekchhuah chu Rs. 2,39,99,987 niin hei hi damlo mi 1,253 te inenkawlna a ni a. Mizoram pawna pekchhuah chu Rs. 1,32,15,374 niin hei hi damlo mi 95 te inenkawlna a ni thung. Heti hian kumin April ni 1 atang khan MUHCS hnuaia damlo inenkawlna bill pekchhuah tawh zawng zawng hi Rs. 19,42,31,512 a ni a, a vaiin damlo mi 6,498 te inenkawlna pekchhuah tawh a ni.