Kawngpui dan avanga harsatna awmloh nan hma la; Ramri-ah Vairengte khawtlang in hnatlang an nei

Home Minister, Lalchamliana chuan Assam sawrkar thuneituten an mipui fuihpawrhin Mizoram mamawh phurluhna kawng an dan avangin mipuite harsatna tawh theih sukiang tura hmalak a ni tih a sawi a. Hetihlai hian Mizoram leh Assam ramri-a buaina thleng avangin nimin khan ramri vengtu, 5th Bn. IR te chu inralring tura hriattir an ni.

Nimin-a sawrkar mi pawimawh te nen ramri chungchanga thutkhawm an neih zawh hnua thuthar thehdarhtute zawhna chhanga he thu hi sawiin Home Minister, Lalchamliana chuan nizan hmasa khan Assam sawrkar thuneitute fuihpawrh, Assam mipui thenkhatin Mizoram-a lo lut tur, bungraw phur lirtheite chu Lailapur bakah, Medili Lei panna kawng leh Hailakandi-ah te an dang tih sawiin, hei hi pawi a tih thu leh Mizoram mipuiten harsatna an tawh theih a hlauhthawnawm thu a sawi a, hetihlai hian mipui ei leh in lakluh kawngah harsatna a thlen lohnan Manipur atanga mamawh lalut turin a thu chuan thil tihfel tawh a ni, a ti a. Hei bakah hian Tripura lam atanga mamawh chawkluh pawh ngaihtuah mek a nih thu leh Myanmar leh Bangladesh lam unaute pawhin an theih ang anga Mizoram tanpui an inhuam thu an sawi niin a sawi bawk.

Hemi hmalam tunkar Nilaini khan Assam Addl. DGP, Gyanendra Pratap Singh, IPS (L&O) hovin Cachar DC te chuan Saihapui ‘V’ a tunhnaia Bomb hmanga School beih chu tlawhin hemi tum hian ramri-a duty Mizoram IR 5th Bn. sipaite chu darkar 24 chhunga in hnukkir turin an hrilh nia thudawn a ni a, IR Police duty te hi an inhnukkir lo a nih chuan Saihapui ‘V’ ah Assam lamin sipai tam tak tirh a tum thu leh inkah mai a tul thu a sawi niin tarlan a ni bawk a. Ramri a buaina nasa zawk chhuak mai thei a nih chungchang ah hian nimin khan Vairengte Joint VC chuan NGO hrang hrangte chu SDO (C) Conference Hall-ah an kokhawm a, IR duty te tanhmun tur siamin khawtlang huapa hnatlang neih nise an tih angin hnatlang hi an nei zui a ni a. Ruahmanna siam angin VC-I te Vairengte Auto Stand thlang ah an hnatlang a, VC-II, VC-III leh VC-IV te erawh Saihapui V lamah an hnatlang a, he thu buatsaih lai nizan dar 10:00 thleng kha chuan thil duhawmlo hriat tur a awm lo a. Nizan khan Home Ministry bultumin State pahnih Chief Secretary te chuan Video Conference hmangin inbiakna an nei bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn