Dan zawm dan en tel dawn

UD&PA Department changtu Deputy Chief Minister, Tawnluia chuan Faina Hapta hman mek puala Faina kawnga inelna ah hripui leng mek COVID-19 doletna atana sawrkar inkaihhruaina Dan zawm that leh thatloh te pawh endikna ah telh a nih dawn thu a sawi.

UD&PA Department buatsaih ‘Cleanliness Week-2020, Mizoram Cleanliness Competition-2020 leh Sensitization on Swachh Survekshan-2021’ hawnna nimin a R.B. Mc Cabe Hall, Aijal Club-a neih a hmanpuina ah he thu hi sawiin Deputy Chief Minister chuan Oct. 2, 1977 atang khan Faina Hapta (Cleanliness Week) hi kumtin Mizoram-ah hman a nih thu leh hemi chhung hian Mizoram khawpui mai ni lo, Mizoram khawpui hrang hrangah pawh kar tluanin Sawrkar Pisa, Zirna In, dam-dawi In leh hmun hrang hrangah te Faina beihpui thlakna hun atan hman a ni thin tih a sawi.

Deputy CM chuan kumin ah pawh ‘Faina Hapta 2020’ hi Mizoram Khawpui 23-ah chuan faina leh thianghlimna kawnga infuih tharna hun atan leh a taka chetlakna hunah hman a ni leh a dawn thu leh ‘Swachhta Rankings’ pawh kalpui a nih tur thu a sawi a. Zirna In, Sawrkar Pisa, Damdawi In, VC/LC Area, Hotel, Bazar leh eitur zawrhna hmun (restaurant)-ah te fai endikna neih leh a ni dawn tih sawiin, “Khawchhung bik Fai Intihsiakna-ah hian tunlai hripui leng mek COVID-19 doletna atana Sawrkar inkaihhruaina dan an zawm that leh thatloh te pawh endik a ni dawn a ni,” a ti.

Mizoram Khawpui Fai Intihsiakna (Mizo-ram Cleanliness Competition) hi kum 2017 atangin UD&PA Department-in a kalpui a, Biate Khua, Khawzawl District in Mizoram Khawpui Fai ber nihna a hauh mek a ni. Mizoram District Hqrs. 11 te Category-I ah awmin, khaw dang 12 te chu Category-II ah an awm a, Mizoram khawpui 23 atangin Khawpui Fai ber thlan a ni leh ang.

Comments

Chhiar Hlawhte