Serchhip District-ah 92.06% enkawl dam tawh

Serchhip District-a COVID-19 hri kai hmuhchhuah mi 10 te chu enkawl dam an nih hnuah nimin khan anmahni enkawlna hmun atanga chhuahtir an ni a, Serchhip District-a hri kai hmuhchhuah atangin za zela 92.06 te chu enkawl dam an ni tawh a ni.

Nimin-a Serchhip District-a COVID-19 hri kai enkawl dam te hi BSF Sipai te vek niin Serchhip District-a hri kai hmuhchhuah te vek an ni a, thla hmasa September 29-a hri kai hmuhchhuah niin hri an kai tih hmuhchhuah a nih hnu hian Nursing School CCC-ah dahluh an ni a, chawlhkar khat chuang enkawl an nih hnuah hri lakah fihlimin anmahni enkawlna hmun atang hian chhuahtir an ni ta a ni.

Heti hian nimin thleng khan Serchhip District-a COVID-19 hri kai hmuhchhuah chu mi 63 niin an zinga mi 58 te chu enkawl dam an ni ta a, tunah hian hri kai enkawllai mi 5 la awmin Serchhip District-a hri kai hmuhchhuah atanga za zela 92.06 te chu enkawl dam an ni tawh a ni. Hetihlai hian Serchhip District pawnlam a hri kai hmuhchhuah enkawl tur rawn dah an awmbelh zel avangin tun dinhmuna Serchhip District-a hri kai enkawllai chu mi 18 an la ni thung a, heng zinga mi 14 te chu BSF Sipai te niin Nursing School CCC-ah enkawl mek an ni a, Chhiahtlang CCC-ah mi 3 awmin Thenzawl AYUSH Hospital CCC-ah mi pakhat enkawl mek a ni bawk.

Niminpiah khan Serchhip District-ah hian TrueNat Laboratory-ah Sample 15 enfiah niin Rapid Antigen Test hmangin Sample 5 enfiah a ni bawk a, heng atang hian hri kai hmuhchhuah thar erawh an awmlo thung a ni.