ZPM Vice President in tihbo an tum thu sawi

ZPM Vice President, K. Sapdanga chuan ZPM in sawrkarna an lo chang ve thei anih chuan Minister-te bathlara thlawhhma neih ngawt ang chi chu tihbo an tum thu a sawi.

Nimin-a Aizawl ZPM Office-a ZPM zawm thar lawmluhna hunah he thu hi sawiin ZPM Vice President, K. Sapdanga chuan Mizoram sawrkar kan neih tawh ten ram leh mipui hmasawnna aia mahni mimal leh chhungkaw bil puarna ringawt an ngaih-tuah avangin mipui an mangang a, chuvangin mi beidawng ni lo; mi mangang, beiseina la nei si tlankhawm ten ZPM chu an lo din ta tih a sawi a. ZPM hian sawrkarna an lo chang ve thei anih chuan Minister-te bathlara thlawhhma neih ngawt ang chi hi tihbo an tum tih a sawi. AMC sawrkar kal tawhah Ward tin te hmasawnna ngaihtuahtu tur, Ward Committee chu function mumal lovin Councillor ten anmahnia thuneihna pumhlum lain an duh duhin thil an ti tih pawh sawiin, “AMC-ah hian ZPM-in sawrkarna kan chang a nih chuan Ward Committee tha tak din a ni anga, dan ang takin a function ang,” a ti bawk.