Mizoram-ah hri kai hmuhchhuah pung leh hret

Niminpiah-a Mizoram-a Sample enfiah atangin COVID-19 hri kai mi 30 zet hmuhchhuah an ni a, Mizoram-a COVID-19 hri kai pawh mi 2310 an tling tawh.

Niminpiah khan ZMC Laboratory-ah Sample 323 enfiah niin heng atang hian COVID-19 hri kai mi 10 hmuhchhuah an ni a, mipa 3 leh hmeichhia 7 niin Ramhlun South leh Dawrpui Veng mi panga ve ve niin chhungkua-a hri inkaichhawng te an ni hlawm a, an zingah hian nausen thla 8 mi a tel a ni.

Niminpiah vek khan District hrang hranga TrueNat Laboratory-ah Sample 178 enfiah niin heng atang hian COVID-19 hri kai mi 14 zet hmuhchhuah an ni a, Lunglei District-ah BSF Sipai hri kai mi 5 hmuhchhuah niin Hnahthial District-ah State pawn atanga rawn lut, Company hnuaia thawk tur hri kai mi pahnih hmuhchhuah an ni bawk. Serchhip District-a TrueNart Laboratory-ah niminpiah khan hri kai mi 7 hmuh niin an vai hian hri kai tawh te nen inkawmhnaih atanga hri kaichhawng an ni bawk.

Niminpiah khan Mizoram-ah Rapid Antigen Test hmangin Sample 687 enfiah niin hri kai mi 6 hmuh an ni bawk a, heng te hi Aizawl Chanmari-ah mi 5 leh Serchhip Chanmari-ah mi pakhat niin Aizawl mi hi hri kai tawh te nen inkawmhnaih atanga hri kaichhawng niin Serchhip mi hi hri a kaina hriatloh a ni thung.

Hetihlai hian nimin khan Mizoram-ah COVID-19 hri kai enkawl dam mi 9 awm ve lehin tun thlengin mi 2174 te chu enkawl dam an ni ta a, nimin thleng khan Mizoram-ah COVID-19 hri kai hmuhchhuah chu mi 2310 niin heng atang hri kai zaa 94.11 te chu enkawl dam ni tawhin tunah hian hri kai enkawllai 136 an la awm a. Hri kai zingah hian nunna chan la awm lovin India rama State leh UT zinga hri kai hmuhchhuahna ah Mizoram chauh hi nunna chan awmlohna ala ni zel a ni.

India-ah hri kai zaa 88.81 enkawl dam tawh :

India rama COVID-19 hri kai enkawl dam pung zelin darkar 24 kalta chhunga mi 61,775 enkawl dam te nen hri kai hmuhchhuah atanga zaa 88.81 enkawl dam an ni tawh. Ministry of Health & Family Welfare chhinchhiahna atanga a lan danin darkar 24 kalta chhung khan India ramah COVID-19 hri kai mi 61,775 enkawl dam leh niin heti hian India rama COVID-19 hri kai enkawl dam zawng zawng chu 67,95,103 an tling ta a, hei hi hri kai hmuhchhuah atangin zaa 88.81 niin tunah hian hri kai enkawllai 7,40,090 an la awm a ni.

India ramah hian Sample 9,72,00,379 enfiah ni tawhin heng atang hian hri kai 76,51,107 hmuh an ni tawh a, hei hi Sample enfiah atangin zaa 7.87 niin hri kai zingah nunna chan 1,15,914 an awm tawh bawk.