Ruahsur vanga chhiatna

Inrinni zan leh nimin zing-a ruahsur nasa tak avangin Mizoram-ah leimin leh chhiatna thleng a awm nual a, mihring nunna chan erawh an awm lo thung.

Nimin zing-a ruahsur nasa avang khan Sihphir khua ah leimin in chenna In pahnih chu a hnawl a, heng te hi Sihphir Neihbawih-a Van-lalmawia In leh Zion Veng-a Vanlalhluna te In te niin bungrua engmah chuh hman a ni lova, vanneihthlak takin mihring thi leh hliam erawh an awm lo a ni. Leimin hian Sihphir-ah hian chenna In pakhat chu a tichhe nual bawk a, nimin khan khawtlang in siamthat hna thawk nghalin chhung-kaw dang 10 te chenna In chu luahzui ngam a nih rihloh avangin Community Hall-ah riahna siam sak nghal an ni bawk a, heng chhiat tawhna hmun te hi nimin khan Chief Minister, Zoram-thanga chuan tlawhin sawrkar atangin tanpuina awm thei ang te ngaihtuah sak an nih tur thu a sawi bawk.

Khawzawl Vengthar-a lei che thin pawh he ruahsur avang hian che thar lehin Vengthar Field bula chenna In pakhat chu luahzui ngam lohin a awm a, helai hmun hi nimin khan Khaw-zawl DC, Zothanmawia chuan tlawhin hmalak dan tur a thlir nghal a, he lei chetna huamchhung ah hian chhungkaw 38 vel an cheng mek a, National Highway No. 6 pawh nasa taka a tlakhniam leh avangin siam rem alo ni tawh bawk a ni.

Tunhnaia ruahsur nasa avang khan Tiau lui pawh nasa taka lianin Inrinni khan tuilian hian Champhai Zote khaw Tractor pahnih chu a la a, heng Tractor te hi nimin khan khawtlang in a zawn hna thawk nghalin Tractor hi hmuh leh a ni a, Tiau lui hi tun anga len chiam hi a awm zen zen loh thun helai vela leilet neitute chuan an sawi bawk.

Heng bakah hian Khawbung leh Khuang-thing velah pawh ruahsur nasa avang hian leimin tenau awmin kawng ping te pawh a awm bawk.

Comments

Chhiar Hlawhte