Mizoram-a COVID-19 hri kai hmuhchhuah zingah nunna chan awmin vuiliam nghal a ni

Mizoram-a COVID-19 hri kai zingah nunna chan an awm ta a, Mizoram-a COVID-19 hri kai enkawl zing ami, Lalsangkhuma, Aizawl Dawrpui Veng chu nimin khan Heart Attack avangin a boral a ni.

Hun engemaw chen Mizoram chu India rama COVID-19 hri kai hmuhchhuahna State leh UT zinga nunna chan awmlohna awmchhun a nih hnuah nimin khan Mizoram-a COVID-19 hri kai hmuhchhuah te zingah nunna chan an awm ta a, Aizawl Dawrpui Veng-a cheng, Lalsangkhuma (62) chu nimin chhun dar 12:20 vel khan a boral tih sawrkar thuchhuah chuan a tarlang a ni. Thudawn danin Lalsangkhuma hi taksa chaklohna avanga In lama tawm deuh reng niin Oct. 17, 2020 khan a chauh deuh thut avangin Drip khai sak turin Aizawl Hospital panpui a ni a, Aizawl Hospital-ah ICU chu a lo ruah loh avangin Trinity Hospital panpui leh a ni a, a thaw a haha a chauh avangin ZMC lam biain Emergency-in Swab Sample lak a ni a, result hriat nghal niin COVID-19 hri a kai tih hmuhchhuah a ni a, Oct. 18-ah ZMC-ah hian duhlutin Ventilator nen enkawl nghal a ni a, hemi hnu hian rawn tha hret hretin Ventilator pawh hman ngai tawh lo thuai tura beisei a nih laiin Heart attack in rawn tlakbuak thutin nimin chhun dar 12:20 vel khan a boral thu hi puan a ni ta a ni.

Thudawn danin Lalsangkhuma hi a nupui leh a fa kum 14 mi te nena khawsa niin a nupui hi COVID-19 hri a kai tih hmuhchhuah a nih tawh avangin Bawngkawn CCC-ah enkawl mek a ni a, an fapa pawh hi Swab Sample enfiah tura khunghran lai mek niin nimin khan a tum thumna atan a sample enfiah leh tura tih a ni bawk. Lalsangkhuma ruang hi sawrkar in COVID-19 hri kai nunna chan te sawngbawl dan tur a ruahman anga vui tura tih a ni a. An In nghaktu an awm loh avangin ZMC atang hian a ruang hi lachhuakin Thlanmual panpui nghal a ni a, Thlanmual-ah hian Kohhran lam ten vuina hun hmangin thlahliam nghal a ni.

Nimin-a Health Minister hova COVID-19 dona kawnga Health Department hmalakna thlirhona tan a nih dawnin Lalsangkhuma sunna hun hi hman a ni a, Dr. ZR. Thiamsanga MLA chuan tawngtaina hmangin hri kai enkawl mekte an damchhuah theih nan theihtawp an chhuah zel tur thu an sawi bawk.