Ramri-a buaina ah Mizoram mi 7 in hliam tuar; Council of Minister thutkhawm neih nghal a ni

Inrinni khan Mizoram leh Assam ramri-ah buaina chhuakin Mizoram lam atang hian mi 7 in hliam an tuar nia thudawn a ni a, Assam lamah pawh hian hliam tuar an awm mek nia sawi niin, he thil thleng chungchangah hian nimin khan Mizoram sawrkar-a Council of Ministers thutkhawm hmanhmawh neih nghal a ni.

Tunhnaia Mizoram leh Assam ramri-a buaina tenau thleng a awm hnuah Inrinni zan thimhlim khan hnamdang, Lailapur (Assam) lam mi ni a hriat ten Vairengte dai Auto Rickshaw dinna hmuna duty, IR Battalion mi te chu lung hmanga an vawm nia thawm a than avangin Vairengte leh a chhehvel atangin mipui an pungkhawm a. Hetianga buaina a chhuah lai hian tunhnaia Vairengte leh Lailapur inkara Dawr sak thar 8 te chu hal niin mipuite inbeihna a thleng zui ta a ni. Kolasib DC, Dr. H. Lalthlangliana chuan Assam lam miten kut an thawh hmasak avanga buaina chhuak a nih thu sawiin, Mizoram lam atangin hliam tuar mi 7 an awm thu leh pakhat chu Kolasib damdawi In-ah enkawl a nih thu bakah ngaihtuahawm a nih loh thu a sawi a. “Assam lam ah pawh inhliam an awm nual thu hriat a ni a, chung zingah chuan pakhat chu Gungur Hospital, Silchar-ah an inenkawl niin kan hria,” a ti bawk.

He thil thleng chungchangah hian nimin khan Chief Minister, Zoramthanga hovin Council of Minister thutkhawm hmanhmawh neih nghal niin Mizoram chhung hmun thum - Thinghlun, Saihapui ‘V’ leh Vairengte-a Assam Sawrkar hnuaia District Administration lamin buaina an rawn siam chu pawi an tih thu sawiin, Assam sawrkar in boruak muanawm a siam vat an beisei thu an sawi a. Ramri a Mizoram mi chengte thlabar thlamuan tur leh Mizoram chhung leh ramri venhimna atan Police dah belh nghal nise an ti bawk.

Mizoram luhka kawngpui chu Assam ram chhungah dan a nih avangin Mizoram mipuite mamawh ei leh bar leh nitin chakkhai thil angte a rawn luh theih tak loh avangin thenawm State dangte atanga mamawh lalut tura hmalak mek a ni a, mipui ten harsatna kan tawk anih pawhin ram leh hnam thil a ni tih hriaa lo tuar hram hram turin Mizoram Sawrkar chuan a ngen bawk.

Diklo taka Assam sawrkar hmalakna hi Ministry of Home Affairs-ah pawh hriattir ni tawhin Vawiin chawhma dar 11:30 hian Union Home Secretary-in Mizoram leh Assam Chief Secretary te chu Video Conference a neihpui dawn bawk a ni.