PUC-ah Minister hovin ‘Wildlife Week’ hman a ni

Pachhunga University College chuan nimin khan ‘Wildlife Week’ pualin hun an hmang a, Environment, Forest & Climate Change Minister, TJ. Lalnuntluanga chuan khuallian niin a hmanpui a ni. PUC Seminar Hall-a ‘Wildlife Week’ puala hun hman ah hian Forest Minister chuan Mizoram-a College tha ber leh hmunhma nei tha ber, Pachhunga University College-in Wildlife Week hman nachang an hria chu lawmawm a tih thu sawiin, hei hian ramngaw leh nungcha humhalh an ngaihpawimawh zia a tilang chiang hle niin a sawi a. Helai ram leh Forest Training School ramchhunga ramngaw tha chu Aizawl khawpui boruak vawngtu leh siamthatu an nih tih hre reng chungin a tichereu leh a daidarh zawnga engmah ti lo turin a chah a. College thuneitute chu a humhalhna kawngah pui thin turin a chah bawk.

    He hunah hian PUC Principal, Dr. Tawnenga chuan kum 1995 khan thing phunna kawnga hma an lak that avangin Indira Priyadarshini Vrikshamitra chawimawi an dawn thu sawiin, PUC ram chu Aizawl khawpui tan rohlu a ni, a ti a. A humhalh kawngah theihtawp chhuaha tan an lak dante a sawi tel bawk. Nimin-a he hun hman zawh hian Minister hian PUC Campus-a ramngaw leh hmunhma an fang nghal a ni.